【全劇終】《我喺街執咗個失憶嘅女仔返屋企》: 繁星祭篇：今年想特別一點（中）

對於嚟緊嘅繁星祭，班上嘅大家傾向付出最低限度嘅勞力去完成。
 
而小悠就一如以往，呢次係佢第一次都係最後一次參與呢個學校活動，我有啲明白點解佢會咁雀躍。
 
至於我，換轉係平常，一定會同大家一樣對活動不抱任何期望，但求完成學校俾我地嘅最低要求；
 
不過，小悠冇幾耐之後就要走，我想將今次嘅繁星祭做得好好睇睇，就當係餞別禮送俾佢。
 
或者係我當上班級委員呢件事實在過於反常，張廷宇喺之後嘅小息走嚟問我：「你係咪唔舒服？居然會去自薦做班委…」
 




「…話晒就畢業，諗住積極啲啫。」我求其作個藉口。
 
「唔信，積極呢兩個字點會由你把口講出嚟，你一定係有第二啲原因。」張廷宇好似識讀心咁睇穿晒我。
 
佢講得冇錯，而嗰個原因就係小悠。
 
「…你真係咁想知？」我試探問道。
 
「嗯。」佢堅定點頭。
 




雖然俾佢知道後大概會恥笑我做埋啲老套嘢，不過要知嘅終究會知，所以早講定遲講冇咩分別。
 
我吸一口氣，準備講：「其實我係為咗…」
 
「阿！帆！」聽到熟悉嘅聲線，我馬上合嘴。
 
小悠一跳埋嚟，就問咗個同張廷宇一模一樣嘅問題：「你係咪唔舒服呀？居然會去自薦做班級委員。」
 
「夠喇！我做班委呢件事本身有冇咁值得在意？」
 




小悠同張廷宇異口同聲：「有。」
 
「妖…」我嘆口氣。
 
「咪講到一半唔講，你話你係為咗咩嘞？」張廷宇追問。
 
小悠在場嘅呢一刻，我梗係唔可以將秘密爆響口，於是回答：「為咗…之後嗰個優點。」每個擔任班委嘅學生，喺繁星祭完結後都會獲得一個優點。我乘機以此為藉口。
 
「咁你覺得我地班應該整咩活動？」小悠興致盎然地問。
 
「…要講嘅話，我仲未諗。」我如實作答，雖然覺得唔可以淨係整幾塊board就過骨，但對於實際要搞啲咩，我仍然在思考當中。
 
或者咁講，既然係送俾小悠嘅禮物，我想出到嚟嘅成果係佢鍾意嘅。
 
所以，我補多一句：「你呢？真係諗住整甜品？定賣珍奶？」




 
「唔…」佢搖頭，「我諗過之後，覺得整其他嘢可能好啲。」
 
「你居然會有拒絕食物嘅一日…。」
 
佢忽然半帶認真：「我只係擔心，自己會忍唔住喺開店之前食晒啲嘢，到時就會冇嘢賣俾人…」
 
「突然間咁有自知之明…」我低聲吐槽。
 
「所以，都係整其他嘢啦。」
 
「咁不如整室內過山車吖？如果問准學校俾我地唔淨止局限喺課室範圍，一定仲好玩！」張廷宇碰一下手掌。
 
「過山車唔夠刺激，而且唔可以成班人一齊玩…」睇小悠嘅表情，佢非常認真地思考。
 




「過山車仲唔夠刺激？你想要點刺激？」張廷宇問。
 
我靜待小悠嘅答覆。
 
佢沉思一會，表情忽然變得明朗：「我諗到喇！」
 
「係咩呀？」我同張廷宇一齊問。
 
「鬼屋！嚟緊嘅繁星祭，我想我地班整鬼屋！」