【全劇終】《我喺街執咗個失憶嘅女仔返屋企》: 繁星祭篇：幽靈學生

返禮堂途中，一直思考頭先校監嘅說話。
 
明明我地班有31個人，佢偏偏話人數冇變過，就好似暗示緊小悠嘅入學對我地班嘅人數冇影響一樣。
 
以佢呢個職位，應該唔會不負責任地亂噏。
 
…咁即係，小悠係佢口中嘅幽靈學生？
 
忽然背脊一涼。
 




點解會背脊一涼，係因為我從來冇忘記過一開始遇到小悠嗰陣，喺佢身上發生嘅閃靈現象。
 
雖然我一次都冇目擊過，但根據小悠自己嘅說法係話佢會無端端失去意識，再開眼嘅時候就會去到一個新地方。
 
不過自從開學冇耐，都好少聽佢再提起閃靈現象，更加唔好講話發生。
 
所以由頭到尾，其實我都搞唔清閃靈現象到底係咩嚟。
 
頭先經校監咁樣提一提，我忽然又在意起嚟。
 




到底閃靈現象同小悠係幽靈學生有冇關。
 
我好肯定所有人，包括呢間學校嘅全體師生、阿妹、千惠，佢地全部人都係睇到小悠，而唔係淨係得我一個見到佢。
 
呢個都係我會喺同佢相遇後嘅冇幾耐就放下戒心嘅理由。
 
因為雖然佢好偶然嘅時候會閃靈，但除咗呢一點，佢橫睇掂睇都係個普通人。
 
思路去到某一處嘅時候，突然被某樣嘢阻擋住，我隨即發現自己遺忘咗一樣好重要嘅事——
 




有一個人曾經表示見唔到小悠嘅存在。但當時小悠只係隨便蒙混過去，我亦都冇再深究。而家諗返起，成件事根本過於超自然。
 
諗吓諗吓，原來已經返到禮堂。
 
「阿帆！你返嚟嗱？」小悠依舊拎住兩隻鬼中之鬼面具。
 
「嗯。」我嘅目光游離於兩個面具之間。
 
「你知唔知呀？張廷宇話你改嗰兩個名好爛呀，佢幫兩隻鬼改咗個新名，一隻叫…」
 
未聽佢講完，我一手將佢拉到舞台後方：「跟我過嚟。」
 
「做咩呀？」
 
我確認四周圍冇人之後，壓低聲線問：「你老實答我，你最後一次閃靈係幾時？」




 
小悠隔咗兩秒後反問：「點解你無啦啦問呢樣嘢？」
 
「因為頭先上學生會室我見到校監，佢係羅凱撒阿爸，佢講咗啲令我好在意嘅嘢。」
 
小悠沉默咗好耐。
 
「如果你唔記得嘅話，咁就…」
 
待我講到一半，佢平靜地回答：「係你帶我去主題公園嗰日。」
 
「主題公園？」
 
「嗯，就係嗰日。」
 




我記得喇，嗰次為咗同佢尋找記憶，同埋測試閃靈現象仲會唔會發生，我同佢先喺裏面睇魚，再玩埋捉伊因。（見#40-41一個人的遊樂園）
 
佢答完之後，我至驚覺頭先好似盤問緊佢咁，忽然有啲內疚：「…我只係唔明點解羅凱撒老豆會咁講。」
 
我以為小悠會八掛校監究竟講咗啲咩，但佢只係繼續沉默。
 
「…可能由頭到尾都係我get錯佢意思，或者佢同羅凱撒一樣都係鳩噏掛。」我嘗試打圓場。
 
「喂你地匿埋喺度偷情呀？出嚟幫手啦班級委員。」張廷宇唔知幾時走咗過嚟。
 
「我去幫手，阿帆你都快啲嚟喇。」小悠恢復平常嘅表情，跳吓彈吓咁返咗落去。
 
我心入面好清楚，不論係直覺抑或理性分析，校監講嘅幽靈學生一定係指緊小悠。
 
而且，雖然只係一閃而過，但頭先問及小悠有關閃靈現象嗰陣，喺佢臉上出現嘅係慌張嘅表情。




 
結合埋頭先返回禮堂途中回想起來，嗰一件發生於同佢相遇之初嘅超自然事件。
 
依然諗唔明白…。
 
或者，我首先要去搞清楚嗰件超自然事件嘅真實面貌。
 
就發生上年暑假嘅最後一日，八號風球嘅夜晚——
 
「我屌，又係你……」我深呼吸兩下，然後走返去看更度同佢對質：「陳伯，我咪叫你唔好亂咁開門俾啲陌生人囉。」
 
「…我幾時有阿？」
 
「幾時有？嗰個咩人嚟？」
 




「…嗰度？嗰…嗰度有人咩？」陳伯瞇起雙眼問。
 
個女仔行埋嚟：「冇用架。」
 
「我係問，我隔離呢個人點解入到嚟？」我再問陳伯。
 
「佢見唔到我架。」
 
陳伯一面迷惘，俾咗一個我絕對唔想聽到嘅答案我：「你隔離？你隔離邊度有人？你唔好嚇我阿。」
 
……
 
距離繁星祭仲有12日。
 
對於呢個同我相處咗十個月嘅同居人，我愈諗愈唔明。