【全劇終】《我喺街執咗個失憶嘅女仔返屋企》: 繁星祭篇：最初的畫

「點解冇相嘅？」我指住眼前立喺地上嘅淺灰色長方體問。
 
墓碑略顯新簇，上面只係刻咗寥寥可數嘅幾個字，仲有一個日期。
 
「因為我地冇見過佢，唔知佢點嘅樣吖嘛。」阿爸阿媽咁樣同我講。
 
我望一眼墓碑上嘅字：「唔知佢係點嘅樣…咁咪好快唔記得囉？」
 
阿媽摸吓我頭髮：「唔會，只要你心裏面愛佢，就唔會唔記得。」
 




「雖然係咁…。」我細細聲講。
 
我偷偷地數吓自己有啲咩係一定要記住：每個禮拜嗰集動畫劇情、每隻陀螺嘅屬性同特徵、每日喺學校學嘅單字、每次去公園都會一齊玩嘅朋友…。
 
咁數落去，話唔埋有一日我會完全忘記呢個冇出世嘅阿妹都未定。
 
只係想像一吓，已經一萬個不願意。
 
返到屋企，阿爸阿媽忙住同唔知邊個開視像會議。
 




佢地俾咗啲顏色筆同畫紙我坐喺地下度玩。
 
坐喺地下，一直諗住頭先個地方——灰濛濛一片，令人唔舒服，可能有啲顏色會好啲，咁阿妹都會住得開心啲。
 
我拎起其中一支筆，開始合埋眼想像。
 
隔離屋有對讀緊中學嘅兄妹，個阿哥就成日話個阿妹除咗多嘢講，就係多嘢講，同埋蠢，佢話：「阿妹呢樣嘢，唔係好嘢。」
 
不過我諗，或者唔係所有阿妹都係咁，至少我會教佢做功課，令佢唔好變蠢，如果我有阿妹嘅話。
 




所以，佢最多都係多嘢講；大概仲會鍾意周圍走，跌到損手爛腳都唔知。
 
因為咁，佢應該唔會好似學校其他女仔咁鍾意留好長嘅頭髮。
 
然後對眼，應該會同我同阿爸阿媽相似。
 
我愈諗愈高興，開始喺紙上動筆。
 
一番功夫之後，我喺畫紙上完成最後潤飾，然後放低顏色筆。
 
「…咁樣就唔會唔記得你喇。」我望住畫中嘅女孩講。
 
不過，成幅畫只係得一個人，或者佢會覺得好悶。
 
呢個時候，我不經意瞥向櫃上嘅相架，係不久前阿爸阿媽幫我影嘅，慶祝我首次養寵物，只係而家睇返，依然覺得好傷心。




 
「…龍貓。」甚至連改名都未嚟得切，就已經整唔見咗嘅龍貓。
 
我唔想唔記得。我想好似記住阿妹一樣，一直記住龍貓。
 
所以，我執返起支顏色筆，喺紙上面開始畫。
 
冇幾耐，阿爸阿媽開完會，我都差唔多畫完。
 
佢地見到我喺度畫畫，表情有啲驚訝：「帆帆你畫得好靚呀，你畫緊咩呀？」
 
我將幅畫俾佢地睇：「係阿妹同埋龍貓。」
 
阿爸阿媽冇講乜嘢，淨係笑住摸吓我個頭。
 




「以後每一日我都帶住呢幅畫，咁就唔會唔記得佢地！」我笑逐顏開。
 
——呢一個就係我開始畫畫嘅契機。