【全劇終】《我喺街執咗個失憶嘅女仔返屋企》: 尋找希望（三）

刺眼陽光照進室內，我緩緩張開眼睛。
 
望向窗外嘅樹，冇人。
 
可能佢今日仲未開始畫畫…。
 
我開始翻閱四散地上嘅字典，幾乎每一日我都係靠呢樣嘢嚟打發時間，除咗要上堂同做練習嘅時候。
 
唔知揭咗幾多頁之後，門外傳來敲門聲。
 




我一下子雀躍起來：「唔通係尋日個男仔…！」
 
房門從外面打開，入嚟嘅係拎住一大疊練習簿嘅紫悅：「好喇，而家係學習時間——」
 
「…係紫悅。」我有點失望。
 
「除咗我之外，你仲有等緊嘅人？」紫悅問。
 
我搖頭：「唔係呀，點會呢？」
 




「好，呢度係今日嘅份量。」講完之後，紫悅將手上嘅練習簿放晒喺我面前。
 
「…我知道喇。」
 
我拎起支筆，開始喺簿上面不停寫，一刻都唔敢停落嚟，否則等緊我嘅只會係雙倍份量嘅練習。
 
「喂喂。」集中喺做題目時，紫悅叫我。
 
我嘅目光冇離開過練習簿：「嗯？」
 




「你係咪等緊嗰個人？」
 
「邊個？」雙手不停繼續寫。
 
「嗰個姓高田嘅男仔。」
 
我吃一驚，抬頭望向紫悅：「你講咩呀？」
 
「尋日撒仔話咗俾我知喇，關於嗰個男仔嘅事。」
 
我低聲抱怨：「呢個羅凱撒，講埋啲無謂嘢…。」
 
「今日成日，嗰個男仔都喺卯月附近轉來轉去，由朝早開始。」
 
「你係話卯月…？」卯月係紫悅嘅姐姐，一個比紫悅更溫柔，全天下間最體貼嘅人。




 
紫悅點頭：「嗯嗯，至於個男仔有咩企圖我就唔知喇。」
 
喺卯月身邊轉來轉去…。佢究竟想點。
 
我再次望向窗外嘅大樹，樹上面依然無人。
 
「係個點嘅人？」
 
我被紫悅嘅問題嚇一跳：「吓？」
 
「難得你識到新朋友，我諗我呢個負責照顧你起居生活嘅親信應該有資格知道佢係咩人吖。」
 
「係媽媽叫你咁問？」我怕個男仔尋日偷偷地走入嚟嘅事已經被人發現咗。
 




慶幸係紫悅搖頭：「只係我自己有興趣，對於呢個擅自走入呢間房嘅新朋友。」
 
我回想尋日救起高田帆同埋之後發生嘅事，最後出現喺腦海嘅係佢畫嘅畫。
 
「佢係…一個畫畫好叻嘅人。」
 
「畫？點樣嘅畫？」
 
我諗起尋日高田帆話過，佢每日畫畫，因為佢父母睇到會好開心，所以答：「睇完之後會令人好開心嘅畫。」
 
「哦，原來係咁。咁我就認同你呢位新朋友。」
 
「真係？」
 
「嗯，如果你覺得嗰個高田帆嘅畫令人好開心，咁我就認同佢係你新朋友。」




 
「多謝你。」我微笑。
 
紫悅講落去：「因為自從希洋件事之後，開心呢個詞就冇再喺你口中出現過。」
 
「…希洋。」一個好耐冇被我講出口嘅名字。