【全劇終】《我喺街執咗個失憶嘅女仔返屋企》: 尋找希望（十九）

【為達致(作者認為嘅)最佳觀賞效果，本話建議配搭ＢＧＭ食用 https://www.youtube.com/watch?v=26Eq1DW-dDU】



喺房裏面嘅大多數時間，除咗睇字典同上堂之外我都冇咩嘢做，好多時候我都會望住高田帆俾我嗰幅畫，瞓喺窗邊發呆。
 
「又望緊幅畫？」唔知幾時，卯月入咗嚟。
 
「嗯！」我坐起身，同卯月見面係一日裏面我最期待嘅時刻。
 




「睇嚟你真係好鍾意休比。」
 
「如果有機會嘅話，我想養一隻龍貓…！」
 
「有機會嘅，一定。」喺之後嗰年嘅生日，卯月就將休比送咗俾我，從此以後，休比就變成對我嚟講比親人更重要嘅存在。
 
「咁隔離個女仔呢？佢係休比嘅主人？」
 
我笑住回答：「佢叫小悠。」
 




「小悠…。」卯月笑說，「你地大家都有一雙紫瞳，唔怪得我愈望就愈覺得你好似畫入面嘅女仔。」
 
「點會呢？佢係一個我永遠都唔會比得上嘅女仔。」
 
「點解你咁講…？」
 
我微笑著搖頭，冇回答卯月嘅提問。
 
此時，夕陽嘅餘光透過玻璃窗照進房間裏。我嘅目光被外面一片橘黃色嘅畫布吸引：「係日落呀！」
 




＝＝＝＝＝＝＝＝＝＝＝＝＝＝＝＝＝
 
「…好靚。」喺我身後嘅阿帆對眼前嘅夕陽發出讚嘆聲。
 
「嗯。」我回憶起不久前喺垃圾房重遇佢嘅嗰晚，然後轉過身問，「阿帆，你覺得我地嘅相遇…係咪一種偶然？」
 
「吓？你噏乜呀？」
 
「雖然我地識咗唔係好耐，但如果有一日你再見唔到我，你會唔會唔記得我架？」
 
佢隔咗一陣然後答：「見唔到你？你指你記得返晒嘢之後？」
 
「嗯。」為咗可以留喺佢身邊多一秒，我甚至講咗好多其他人根本唔會信嘅大話，失憶、閃靈……全部都係出於自我滿足。
 
「咁話晒我都叫喺你落難嘅時候幫過你，得閒出嚟食餐飯都得啩？唔會見唔到嘅。」




 
我勉強笑：「又係喎可？」
 
「雖然咁講好老套，但我相信每一段相遇都有佢嘅意義喺度，我會努力記住每一個人生中嘅過客。」
 
聽到呢一句我忍唔住笑，因為佢同以前一樣，真係冇變過：「哈哈，估唔到你會講呢啲野～」
 
然後，佢繼續講落去：「而你，我知道一定唔會係一個過客，至少喺我以後嘅人生入面，我都想見到你。」
 
「阿帆…」
 
見返佢之後，時間過得好快。從一開始我就唔希望佢會記得我，相反佢唔記得我仲好，我實在帶咗太多麻煩俾其他人，至少喺以後，我希望留喺佢回憶裏面嘅係每一日都開開心心嘅小悠；而唔係嗰個臉上一啲笑容都冇嘅我。
 
更加唔會奢望，我對佢嘅感情可以得到回應。
 




雖然呢啲都係我嘅真實想法，但自從知道佢鍾意一個叫珀奈嘅女仔，然後呢兩日宿營又有一個叫千惠，係對面學生會嘅人同佢好似進展得好快，我先發覺佢比我想像中受歡迎得多，雖然咁樣係一件好事，但每次一諗到呢度內心就會昇起一陣前所未有嘅焦躁感，我好討厭會有呢種感覺嘅自己。
 
因為，呢個時候嘅我總會想不顧一切，忘記身上背負嘅罪孽，忘記嗰個成日帶麻煩俾人，淨係識得喊嘅自己，去將心裏面嘅感情傳達俾佢知道。
 
我踏前兩步，但唔覺意失去平衡，意外地將佢壓到床上。
 
本來我地只會喺好近距離之下對望，僅此而已。但唯獨是呢一刻，我想做一次嗰個不顧一切地想去將心裏感情傳達俾佢知嘅自己。
 
我將身體稍微傾前，直到嘴唇互相觸碰。然後喺心裏面同自己講，喺呢一下之後，我就會變返平時嗰個小悠。
 
對高田帆最重要嘅小悠。

========================
 
「小悠…？都唔知你講緊乜。」臨別前，我拎咗嗰幅畫俾紫悅睇，佢望到之後搖頭笑說。




 
「嘻，你唔知都得。」我細細聲笑。

========================
 
醫院裏。
 
等到疑似高田帆嘅阿妹走咗之後，我偷偷走入高田帆嘅病房。
 
「喂。」
 
見佢冇反應，我開始搖佢膊頭：「聽唔聽到呀？」
 
如預期之內，佢被我嚇倒。我一方面對於搞到佢入院呢件事有啲內疚，一方面又覺得佢好好笑，因為原來佢係啲咁怕鬼，同埋咁易就暈低嘅人。
 




我自私地想要發掘佢更多嘅另一面，所以繼續扮演一隻失憶嘅鬼，將呢一場唔知幾時會穿煲嘅鬧劇演落去。
 
「…我唔知你係咪會keep住呢個樣，總之你唔可以整個恐怖樣出嚟或者做啲會嚇親其他人嘅事。」最後，高田帆選擇相信我。
 
「咁你放心啦，我都唔識變恐怖樣嘅。」嚟到呢個地方之後，又或者係咁多年以嚟，我第一次笑得咁開心。
 
「我真係唔係好明，你想做嘅事究竟係咩。」回憶中嘅紫悅攤手說道。
 
我想做嘅事…
 
「係喎，你有冇名？」隔咗一陣之後，高田帆問。
 
嗰個時候，我冇答到紫悅，但其實心裏面有一個答案。
 
我想成為對高田帆重要嘅人。
 
而嗰個人唔係十二年前佢喺某個小島上遇見嘅女孩，而係…
 
「我叫小悠，你呢？」我緩緩抬頭，用一把最開朗嘅聲線同佢講。