【全劇終】《我喺街執咗個失憶嘅女仔返屋企》: 之後…

「即係話，小悠會喺你地學校繼續讀書？」 阿妹講完之後擺咗啖意粉落口。
 
「嗯，就係咁喇。」我則將切好嘅牛扒送入嘴裏。
 
喺嗰個叫敍爾特嘅小島返嚟之後嘅星期日，我、阿妹，仲有千惠一齊去咗學校附近嘅家庭餐廳食午餐。
 
「話說，點解你會喺度？」吞咗啖牛扒之後，我問啱啱拎完嘢飲返嚟，喺呢個屬於我同阿妹嘅家庭聚會裏面點諗都唔係咁適合出現嘅千惠。
 
「你問我？係晴晴叫我嚟嘅。」佢將矛頭指向阿妹。
 




「咁我本身預小悠都會嚟，先會叫咁多嘢食吖嘛，點知你又話佢唔嚟…，咁啱千惠又喺附近未食飯，我咪叫埋佢一齊嚟。」阿妹解釋。
 
「講明先呀高田帆，呢餐我唔會夾返錢俾你架。」
 
雖然冇預計千惠會加入呢餐飯，但基於一早應承咗阿妹要請客，所以唯有死死氣就晒佢地：「…知道喇，今餐隨便叫啦…。」
 
佢兩個異口同聲咁講：「多謝阿哥！」/「多謝高田帆！」
 
與此同時——「四碟原味雞翼。」侍應將手上嘅四碟雞翼放到我地張枱上面，令原本已經狹小嘅餐枱顯得更擠迫。
 




望住佢地一人拎住一隻雞翼食，我低聲嘆氣，開始為銀包擔憂：「頭先嗰句，我可唔可以收返…。」
 
「話說，小悠呢？」千惠拎起張餐巾抹嘴。
 
「佢今日要去學校辦正式嘅入學手續，所以嚟唔到。」就如同羅凱撒所講，小悠之前係用旁聽生身份入讀我地學校，唔係正式學生；理論上佢要搞多次入學手續，至可以用返希渝呢個真名再一次成為我地嘅同學。
 
順帶一提，關於對佢嘅稱呼，小悠本人嘅睇法似乎係冇乜所謂，雖然我唔係冇嘗試改口叫佢希渝，但結果有兩種，一係個腦切換唔嚟，中途叫返佢做小悠；
 
另一種就係每次叫佢本名之後，我地之間都會好快陷入一股微妙嘅氣氛（莫名嘅羞恥感）之中，呢個時候無論係我抑或佢，講嘢都會開始食螺絲，同埋開啟禮貌mode，情況大概好似咁——
 




場景一：黃昏嘅回家路上
 
「咳咳…希渝。」我清一清喉嚨，叫咗佢個名。
 
佢好似嚇一嚇，然後擰歪臉，個人幾乎背向我：「…嗯？」
 
「…冇、冇，我想問…你買唔買繽繽…我係指繽紛樂…？」
 
佢依然冇面向我，但我隱約瞥見喺佢雙頰浮現嘅紅暈：「…唔使，屋企仲有，唔該你。」
 
「…哦、哦！唔使客氣…。」
 
場景二：共進午餐
 
「咳咳…希渝。」我清一清喉嚨，叫咗佢個名。




 
佢聽完好似被嘴裏嘅食物噎親一樣不停咳嗽，我即刻遞咗杯水俾佢。
 
一陣之後，佢問：「…頭先你叫我？」
 
「…額，係。」
 
「…咩事？」
 
「…額、冇，只係諗住叫吓你。」
 
「哦哦，乜原來係咁呀…。」佢撇開視線，捧起杯水飲一啖，又翹咗一吓耳邊嘅髮絲。
 
呢套動作令我莫名地覺得好可愛，耳根傳來發燙嘅感覺，我一口氣將眼前碟意粉一嘢掃晒入口。
 




呢個舉動好似驚動咗佢：「…阿帆？」
 
「…冇事！突然覺得好肚餓！超級肚餓！」
 
「…咁，你要唔要食埋我嗰碟？」
 
「…都、都好，唔該你。」
 
「…唔使客氣。」
 
基於上述理由，喺我可以自然而然地改口之前，我都暫時會叫佢小悠。
 
返番去家庭餐廳裏面。
 
「呼…諗落不如我都轉去你地學校度讀書？」千惠突如其來嘅宣言，成功令我將嘴裏嘅汽水噴出：




 
「理、理由係？」我抹吓個嘴。
 
「咁你同小悠一日未結婚，我都仲有機會嘅，只要製造多啲我地兩個見面嘅時間…。」千惠講到一半，今次到阿妹將嘴裏嘅汽水噴出。
 
我趕緊拎幾張紙巾俾阿妹。
 
「乜千惠你原來一直對阿哥…」阿妹如夢初醒咁樣問。
 
「係呀，自從第一次見面之後。」
 
內心只希望快啲完結呢個話題嘅我低聲說道：「你就放過我啦…。」
 
點知阿妹居然執著喺無謂嘅地方，仲要補多幾槍：「…呢個人明明又唔係靚仔，性格又幼稚，喺屋企仲要懶到執房都要人提，著完啲底褲又…」
 




危急關頭之際，我喝止咗阿妹：「喂！你仲要數到幾時？！」
 
「咁你要問吓佢喺聯校宿營嗰次對我做咗啲咩喇。」千惠講完，阿妹一臉狐疑（夾雜鄙視）望住我。
 
「咩都冇做過！！」
 
然而阿妹嘅眼神話俾我知佢唔係好信我講嘅，就喺我高速思考緊應該繼續解釋定係強制終止話題之際，千惠終於收手，然後一副八掛嘅表情：「講笑咋，咁你同小悠拍拖未啫？」
 
我遲疑一會：「…其實未。」
 
「吓？？？！！！」兩把驚訝嘅聲音響徹成間家庭餐廳。