等到肥豬腦細放埋啲卡入卡套...

「好~出發!」肥豬腦細帶頭開門。

Emma就跟住我後面行...

都係嗰句,俾Emma跟住後面總係覺得怪怪地...

唔係因為我係小男人,所以一直都係跟住Ashlynn後面行!





而係跟喺Ashlynn身後就唔使俾佢監視住!而且仲可以安心𥄫女~

講真就算自己條女真係成個連C雅咁雞格,望得多都厭啦~

男人喺街上𥄫吓其他女都好正常姐~

但女人唔係咁諗㗎嘛~

女人就係要你唔單止喺心裡,就連眼裡都只有佢!





冇錯!女人就係咁霸道!

或者唔係個個女人都係咁嘅~但我嗰個係囉...

所以女朋友行前面有行前面嘅好~

而耐咗...就唔習慣...

唔習慣俾女仔跟喺身後行...特別係靚女...





又一次正正經經咁行,上到嚟吉壽日本料理...

「隨便叫~唔好客氣~」肥豬腦細扮晒大方。

『多謝老闆~』屌你收皮啦...

唔好話食放提食幾多都係俾幾多...你條仆街本來就冇諗住請!本來就係諗住屈我!

咁嘅腦細真係食得屎!

Emma坐喺我隔離,依然保持微笑。

其實我真係唔知佢哋嘅感情如何...

老老柒柒以肥豬腦細呢啲仆街性格,我唔會覺得佢會對Emma有幾好囉...





我更唔覺得Emma會同肥豬腦細有幾親囉...

我拎起幾張唔同類型嘅點菜紙:『Emma,你想食啲乜?』

「冇所謂,我咩都食~」Emma咪咪嘴咁笑住答。

問都係循例㗎姐~

『嗯~咁我就隨便點㗎喇~』因為記得...上兩次都係點啲大圍嘢~而Emma都真係乜都食~仲食得好滿足~

「嗯~你點乜,我就食乜~只要係你點,我都會食~」Emma用好溫柔嘅聲線喺我耳邊講...

呢一刻,我又震咗一震!





Emma把溫柔嘅聲線...真係好甜...

又聽到我個心都軟埋...

雖然話我已經有Ashlynn...之但係聽到其他女仔把聲有反應...都無可厚非㗎喎...

就好似睇日本愛情動作片聽女優叫床同自己條女叫嘅感覺都唔同啦~

所以我又唔需要自責嘅~

我喺幾張點菜紙上寫Number。

然後揀返啲大圍嘢~

冇問題~一定冇問題~





成個朝早...都係發生住相同嘅事...又重來一次...

『要唔要啲Wasabi?』我繼續照顧Emma。

「少少夠喇唔該~」會講唔該嘅靚女吖...

真係難能可貴...

唔好話靚女...搵個會講唔該嘅女仔喺身邊都難...

女人總係覺得男人服侍女人係天經地義...

但事實唔係應該調返轉㗎咩?





要我服侍你唔係問題吖~你扮吓唔好意思都好吖~你驚咩姐?我實幫你舐㗎喎~

你而家連扮都唔扮吓...算點呢?

香港...女權主義世界第一...

啲野食一路嚟,我哋就一路食。

Emma都係嚟乜就食乜。

睇佢咁完美嘅身段,真係估唔到咁刷得!

唔會肥㗎咩?

唔會走樣㗎咩?

呢啲係唔係就係傳說中嘅天生麗質難自棄?

一直跟住上兩次嘅次序上菜~

有靚女送飯,真係特別好胃口~

好胃口到又好似...忙記咗啲嘢...

係!要打俾Ashlynn!

我立即拎部電話出嚟打俾Ashlynn!

「嘟...喂~咁啱嘅?我正想打俾你~」聽Ashlynn把聲,心情好似OK喎。

『好明顯就係因為我哋心靈相通啦~』唔通我輪迴咗兩次...仲要兩次都唔記得打俾你又話你知咩?

「把口咁甜嘅?食咗屎嚟吖?」Ashlynn甜絲絲咁講~

『係吖~食咗你嗰啲吖~』食屎點會甜㗎痴線...

「咦~核突~」Ashlynn成條小蟹柳咁~

『係吖係吖~』又係你講先嘅...

「咁你而家做緊咩吖?」Ashlynn隨口問。

『食緊嘢~』我又隨口答。

「食緊屎吖?」Ashlynn又隨口問。

『係吖~食咗你嗰啲吖~』

「咦~核突~」

係吖...好無聊...

情侶之間嘅對答就係咁無聊...

未一齊之前,有無盡咁多話題~傾到三更半夜陪住我~

一齊咗之後,都係有無盡咁多話題~只係變成講之不盡嘅無聊話題~

不過有無聊話題已經好㗎喇~

更無聊嘅係...只有佢講...我只要聽...

基本上係唔使俾任何意見~因為我嘅意見都係廢嘅~

『咁你食嘢未吖?』我邊食邊問。

「而家食㗎喇~」Ashlynn又隨口答~

『哦...咁你去食啦~』我又繼續食。

「收線喇?」Ashlynn問得好突然。

『嗯~』食嘢喇嘛~梗係收線啦~

「做乜收得咁急吖?好阻你吖?」Ashlynn問得有啲唔係咁客氣!

『唔係...』點敢話阻吖...

「唔係就得啦~」

『呃...』

「唉算~見你今日咁乖識得打俾我,就俾你安安樂樂咁食屎啦~」

『多謝~』真係多撚謝晒喇~

「好啦係咁啦~Bye~」

『Bye...』我都未Bye晒,Ashlynn就Cut鳩咗我線...

唉...是撚旦啦~次次都係咁㗎啦~

有得我安安樂樂咪好囉~最怕就係要傾住電話食嘢...

未幾...

“And you don't seem to understand...”

電話又響...

望一望個電話...

又係Ashlynn...

我立即滑動解鎖...

『喂~點吖BB~好掛住我咩?』口中塊三文魚刺身都未咬碎...又打嚟...

「得鬼閒掛住你吖~想話今日唔使打俾我喇~你放工先WhatsApp我啦~」Ashlynn講得有啲急。

『吓?』咁好死?

「係吖~見你今日咁乖就唔使你打俾我報到啦~你開心啦~甩難啦~」Ashlynn串柒柒咁~

『又唔好咁講...我會好掛住你㗎...』真係甩難喇~~~

「收啦你!唔講喇!係咁啦!」Ashlynn一講完就Cut鳩我線!

我真心有種甩咗狗帶,可以亂鳩狗衝嘅感覺~

講返轉頭...原來有啲嘢...係可以改變...

就好似啱啱咁...我記得要打返俾Ashlynn...佢嘅態度雖然都係閪閪地...(屌佢有邊日唔閪㗎?)之但係...成個故事唔同晒~

唔通真係...可以改變?

就算係同一日...只要做啲改變...故事發展都會有所改變?

就喺呢個時候,肥豬腦細問Emma:「今朝到而家,返工慣唔慣吖?」

「嗯~OK吖~」Emma亦答得好清脆。

我望一眼Emma,先發現原來佢笑容之中略帶點點哀愁...

對上兩次都冇望到Emma...原來佢答得唔係咁開心㗎咋喎...

肥豬腦細接住問:「係唔係有咩唔明吖?可以問飛揚㗎喎~定係飛揚佢對你嘅態度有問題吖?」

嗯?肥豬腦細呢段說話...上兩次都冇㗎...

定係因為我上兩次都掛住應付Ashlynn所以Miss咗?

Emma帶住微笑揮晒手,擰晒頭:「唔係吖~唔係吖~真係OK吖~飛揚佢好好人吖~」

肥豬腦細擺出一副老闆樣望住我:「飛揚!你真係要好好照顧Emma吖知唔知吖?」

『係!我會好好照顧Emma!』你又放心同我定!我出名樂於助人嘅!

肥豬腦細繼續食:「嗯!Lunch唔講公事!繼續食~」

『係嘅係嘅~』屌你又係你講先...

繼續食嘢~又偷偷留意住Emma...

又好似...同上兩次咁...冇乜分別...

頭先Emma同肥豬腦細嗰幾句,會唔會真係我上兩次Miss咗呢?

而今次因為我同Ashlynn傾完電話,所以肥豬腦細就有機會叫我好好照顧Emma...我又多咗回答肥豬腦細嘅機會...

係掛...可能係啦~是旦啦~反正都冇乜大影響~

大嘅影響係...究竟我可唔可以過到呢一日...脫離輪迴...

飲飽食醉之後...

「多謝你474蚊。」侍應死口死面咁走到埋嚟。

肥豬腦細揭一揭個卡套:「哎呀!原來我放咗啲舊卡入去喎!真係大懵喇~呀~飛揚,你出住先~」

嘩!屌...你呢啲唔係大懵啦!係撚鳩我咋喎!

『老闆~唔係咁吖化?呢啲笑都好講嘅?』我烚熟狗頭咁隊張單俾肥豬腦細。

「真係唔小心放返啲舊卡入去吖嘛!」肥豬腦細又隊返張單俾我。

屌你老味你份人鳩唔鳩屎啲吖?

老閪都要屈我俾錢!

咁撚鳩屎你唔好去做黑警?!

「新嚟新豬肉~不如等我俾啦~我張卡用到嘅~」Emma喺佢嘅手袋仔拎個銀包出嚟。

我諗點都好都冇理由要個初嚟報到嘅女仔俾錢...

『唔使喇~我當儲分~』講完夾埋張卡落張單度。

「食嗰500蚊都唔夠都要“爭”住俾錢...」個侍應一邊離開我哋個範圍,一邊口噏噏。

阿哥仔,你見到嘅就500蚊,你見唔到嘅係Geometric咁上!

你話我好似D Agent咁吓吓都有咁多阿婆俾錢你呃就話姐!

我打份牛工咋!

就嚟連屎都冇得食喇!

屎都冇得食都唔緊要喇!有乜慘得過俾腦細屈請食飯?

兩次都唔夠...第三次喇!

一次就話我單純姐...兩次就係我戇鳩...三次係乜吖?

柒撚懵懵食甜筒囉!

屌...睇嚟真係改變...唔到?

有啲嘢真係...就算點改點變...中間行過唔同嘅路...加咗唔少小插曲...到最後都係走返去同一個結局?

點都好啦~錢就俾咗~柒又柒多次~諗多都無謂~

食完個Lunch返到公司繼續做嘢。

Hea住咁做做做~

反正你努力咁做做做又好,Hea住咁做做做又好,老闆都係會好努力咁隊隊隊隊啲嘢俾你做。

係唔係都做唔晒㗎啦~咁努力做乜鬼姐?

更何況,有過上兩次嘅經驗,係爽手咗好多嘅~

真係唔使咁用心去做~咁用腦去諗~

再做多做...

硬係好似有啲嘢唔記得咗做,但...醒唔起...

你永遠都唔會記得你唔記得咗啲乜,直到又有人提你。

“Fly me to the moon And let me play among the stars”電話響起Fly Me To The Moon嘅鈴聲。

咦?細妹打嚟?上一次都好似...係喎!

『喂~放咗學喇?』我放低手上嘅工作,帶上Hand-Free。

「返到屋企添啦~唔該哥哥幫我收咗衫喎~」Hand-Free裡傳嚟細妹嬌娋嘅聲音。

『你唔怪我摺得唔夠整齊就好喇。』

「好整齊吖~整齊過我自己摺啦~嘻嘻~」

『以後都由我幫你摺好唔好?』可以經常搞阿Wing嘅內衣褲...

咩搞姐?我都冇搞!

「好吖好吖~」

『咁懶㗎咩?』

「有哥哥照顧就要懶懶~」

『係喇係喇~係唔係打嚟想問我請咗假未吖?』阿Wing唔打嚟都唔記得...一打嚟就醒返起...

「係吖係吖~請唔請到假呢?」

『老闆啱啱先返咋~我而家去問~我等陣WhatsApp你~』

「OKOK~Bye~」

雖然明知肥豬腦細一定批~不過都要問~唔問又點會批呢~

當我一起身嘅時候,肥豬腦細就由房走出嚟...

「我而家要出去見個客,今日都唔返嚟㗎喇。自己做完晒嘢就放工啦吓~」肥豬腦細拎住個公事包急急腳走人。

『呀老闆...』我都未將我要講嘅野講完...

「食飯錢遲啲俾返你啦!我趕時間呀!」

『錢好閒㗎姐~我想問...星期四我可唔可以請日假?』

「請假...得得得得得啦你做得晒啲嘢就請啦吓係咁...」肥豬腦細邊講邊衝出門口。

穩穩陣陣用返相同嘅態度同字句就包冇問題~

好~覆返阿Wing先~

我笑笑口咁立即Send個WhatsApp俾阿Wing~

“OK!假已請~”

“噹” “Wing:賜酒抵錫^3<”

好~又搞掂~可以繼續專心工作!

快快手手做埋星期四啲嘢先~

假如真係有星期四...

已經係第二次輪迴...究竟會唔會有星期四呢?