簡介

工作工作太多工作*





9點20分準時回到辦公室,又開始新一天的工作,作為一個年輕棟樑,我當然明白到溝通係工作上簡直係不可或缺既事,回到公司第一時間就當然是打開Skype上線,好讓其他公司的朋友知道我已經有空跟他們溝通一下放工後有什麼節目。
 
在打開skype後,恰好經理走過來,早已把skype縮到最少的我又點會心虛呢? 經理跟我說昨日交給他的報告把風險預計的部份弄得不錯,叫我比心機繼續下去。我用簡單的點頭微笑作回應。心裡不其然暗笑,當然啦我每次打開skype也會細心檢查有無調到靜音,也會眼看八方,看有沒有經理級別的人士走過,這些都是我風險預計的訓練。
 
其實作為一個新人在組長還沒回來之前真係唔知做咩好,處理手頭上的文件?未免太過盡責,問經理有沒有事情幫忙?也未免太過扮野。不做第一,也不做最後,呢個連數錯字既吳克儉都知道既生存方式,我又有麥可能唔識。係呢段真空時期我多數會有2個選擇,一係就坐係位上網,過著輕鬆而有危機感既扮工時間,一係我就會到洗手間過著真真正正的辦公時間。今天早上我不小心空肚吃了早餐,所以我選擇了後者。
 
組長回來後工作就真正開始了,我組的這個組長是女來的,性格屬社交煩西形,工作能力屬指手劃腳形,樣貌屬化妝肥西形,名字叫大安。在第一天知道我被安排到大安那組後有點失落,原因唔係因為個組長係肥西,雖然我只係一個職場新鮮人,但是一般既低級錯誤如係度食係度柯我係絕對唔犯,失落係因為佢出名唔做得又要瀉(肩),跟著佢真係分分鐘背脊比人篤到穿哂自己都唔知道呀。
 
作為一個新鮮人主要既工作就係影印同一些行政上既工作,手板眼見,作為一個high pay既員工又點會難到我呢。唔知係咪我high pay既消息流傳左出黎,大安成日想叫我做一些難度比較高既工作,其實我真係好想幫佢手嫁,但作為一個做又三十六唔做又三十六既打工仔,我只好婉拒佢:「大安姐咪玩啦,我邊識做呀,我呢啲偶像派既員工,high pay係比我個樣既咋,唔關工作能力事嫁。不如你比阿邊個幫你手呀。」當然大安姐都唔係蠢嫁,佢又點會信我呢,因為佢睇得出如果個pay係比我個樣,其實我係under pay緊,但係我出到聲,大安姐都只好另外搵同事幫手。
 




專心工作既時間過得特別快,又到午飯時間。今天是經理請食飯的日子,我是很期待的,期待唔係因為可以同一大夥同事聯誼,而係因為每逢跟經理食飯一定會超過規定的一小時午飯時間。平時食飯趕頭趕命,滾水淥腳,真係分分鐘行慢少少都遲到,今日就唔同呀,大條道理食成個半鐘飯仲可以思思然用多一支煙的時間掛念誰,真係爽YY。
 
食完個long lunch,都已經下午三點,柯埋篤屎離放工既時間真係差無幾,話好忙又唔係,話無野做又唔係,但為左避免加班,真係要出手做野啦,不過做得哂自己果部份又點呀,做我呢一行既組長唔放工做細既又點敢走呀。合約寫到明朝9晚6,作為一個重視合約精神既員工既我,係呢一方面我精神上真係飽受煎熬呀,係為左平係心理下我只好化身為一個鍵盤戰士,係skype既世界同朋友申訴一下「吊你老味,到底今晚要陪坐到幾撚多點呀。」