貧民窟走出嚟嘅異能球星 (第一季已完結): 第07章
07
———馬天尼而家喺學校超級受歡迎，於是艾瑪會同佢形影不離，慎防再有Nana果啲狂蜂浪蝶埋身。
———插班生愛米彌亞人氣都好高，有唔少男仔追，但愛米喺學校多數都會搵馬天尼做擋箭牌。
———見馬天尼同愛米傾得特別投契，艾瑪都會有少少呷醋，但始終果個係佢家姐，而且佢都想患病嘅家姐過得開心快樂，所以都唔介意馬天尼喺愛米面前冷落自己。
———最近學校成立咗一個新社團，Cheerleader Club(CC)，由一班年輕女學生組成，為最近風頭極猛嘅籃球隊打氣。
———Nana係CC嘅骨幹成員之一，當籃球隊知道有班女會為自己跳哂舞吶喊助威，個個都好興奮。
———而最尷尬嘅事係Nana走埋馬天尼身邊，質問點解馬天尼唔回覆自己。
———馬天尼向Nana誠心道歉，表示自己想專心籃球，唔想花太多時間認識新朋友。
———Nana又無去到好盡，剩係話俾馬天尼知自己好傷心，覺得馬天尼唔尊重佢。
———馬天尼不斷道歉，心諗：「靚女妳放過我啦...」
———「既然係咁，你要補償我，今個星期六係我生日，你會唔會出席我個生日派對先？如果有你呢位籃球隊大明星出現，我同我班同學一定會開心到飛起。」Nana使出殺手鐧。
———「咁呀... 妳點話點好啦... 係啦... 我都得閒嘅...」馬天尼個心滴緊血，腦海中浮現艾瑪暴走嘅樣。
———Nana補多刀：「咁你快啲Unblock我電話啦，我腥派對嘅詳情俾你，我而家同啲朋友講呢個好消息，你唔准放飛機㗎！」
———「哦...」馬天尼好無奈咁劃咗幾吓手機，就收到煉獄死神傳嚟嘅邀請帖。
———練波時間，馬天尼原神剝落，俾鬍鬚叫埋一邊。
———「點呀情聖？今次係家姐定細妹呀」鬍鬚佬都費事兜圈，直接問。
———「唔係呀... 今次係Nana...」馬天尼好尷尬咁講。
———「屌爆你咩！你鑊鑊新鮮㗎喎！呢條Nana又係咩料呀？」鬍鬚佬幾乎被激到嘔血。
———結果馬天尼原原本本將件事交代。
———「咁樣，你嘅問題太複雜，我都無能為力，今日我准你喺場邊做啲輕鬆啲嘅探練，自己諗掂佢。」鬍鬚佬聽到一額汗，眼前呢個年輕人所面對嘅嘢認真唔簡單。
———當晚，交換完禮物後，馬天尼鼓起勇氣對艾瑪坦白一切。
———換來嘅係艾瑪嘅眼淚，馬天尼好焦急咁問咩事，艾瑪搖搖頭無出聲，一直低頭飲泣，馬天尼攬實艾瑪：「對唔住，如果妳唔想我去，我一定唔會去，就算Nana之後有將憎恨我都好，我都唔想令妳傷心。」
———艾瑪無回應，抹走淚水獨自返咗自己房，留低馬天尼喺房胡思亂想。
———第二朝艾瑪又好似完全無嘢咁同愛米挽住馬天尼返學，令成晚無瞓嘅馬天尼個心更加慌：「而家即係點？」
———另一邊廂，電話裡頭被Unblock咗嘅Nana對話窗一直震過唔停，但只要馬天尼覆一句就會換嚟十句，好似有啲唔妥。
———然而，艾瑪Lunch果陣同馬天尼講咗啲心底話，內容係佢知道一開始自己做錯咗，導致事情變到咁，佢知道馬天尼嘅性格，亦好相信馬天尼，不過佢覺得馬天尼要好小心Nana呢個女仔，佢隨時會有下一步動作，要馬天尼去完個生日派對就好疏遠呢條女。
———「收到！我知道喇！多謝妳... 艾瑪！」馬天尼捉住艾瑪隻手：「我愛嘅係妳，唔係Nana。」
———艾瑪怕怕醜醜咁縮手，嗔：「哼！咁愛米呢？你知唔知你成日發開口夢都會嗌愛米個名？」
———「我... 坦白講我喺愛上妳之前... 其實一直單戀愛米，但妳要相信我同佢之間並無發生任何嘢㗎。」馬天尼苦惱地向艾瑪坦白。
———「傻佬，盲嘅都睇得出啦！你以為我唔知你著27號波衫嘅原因咩？」艾瑪其實好清楚馬天尼內心諗乜。
———「咁妳唔介意我仲鍾意佢咩？」馬天尼一向都知自己喺感情方面太嫩。
———「就算我介意有用咩？我家姐絕對清楚我嘅脾氣，你媾到佢先算啦，嘻嘻。」艾瑪似乎深思熟慮過愛米嘅問題。
———「艾瑪，多謝妳咁體諒我，我同愛米似乎真係無咩可能，我年盡力放低愛米。」馬天尼終於知道艾瑪原來咁愛自己。
———佢同艾瑪嘅關係火速升溫，肉體上心靈上都能夠好坦白赤裸咁交流。
———好快就嚟到星期六，馬天尼帶埋份放學求其買嘅禮物去Nana屋企參加生日Party。
———著住牛仔褸休閒褲嘅馬天尼一走入Nana住嘅大宅花園就引起成班人起哄。
———而今日無戴眼鏡、著住一件火紅色低胸吊帶迷你裙嘅Nana即刻主動走埋去迎接馬天尼，而且哄到好近咁講：「好開心你真係嚟咗，今日唔准早走㗎，呢度有好多人都係你嘅Fans，你當自己係半個主人家就得㗎喇。」
———「好呀... 哈哈... 生日快樂，妳今日好靚。」的確Nana打扮得好惹火，條腿又幼又長，對波又圓又大，令馬天尼忍唔住望多咗幾眼。
———「嘻嘻，聽到你講呢句我開心過收到今日嘅生日禮物呀，多謝你。」Nana突然攬住馬天尼，好誇張咁表現到濕哂，眼睛泛哂水。
———現場又唔知點解又起哄叫囂，好似有人求婚咁熱鬧，馬天尼心諗：「各位大佬，放過我啦...」
———「呀，係吖，送俾你嘅禮物，生日快樂。」馬天尼向後掙脫一步，喺牛仔褸袋口拎咗份禮物出嚟遞俾Nana。
———「你肯嚟同我慶祝生日我已經好滿足喇，我唔敢相信你居然有為我準備禮物，天啊，我真係好幸福呀。」Nana彷似一個小球迷咁非常受寵若驚。
———所幸Nana都要招呼近嚟嘅朋友仔，馬天尼終於可以鬆一口氣，但時不時都會有啲學妹搵佢搭訕同自拍。
———唔擅長社交嘅馬天尼真係想搵機會閃人，但基於禮貌佢都無咁做，企埋一邊搵吓橙汁等時間過。
———上半段都無咩特別，Nana帶住馬天尼喺間屋四圍參觀，去到中段切吓蛋糕、同Nana影吓相，去到尾段馬天尼諗住坐多陣就走人。
———但馬天尼部手機喺呢個時候不斷震。