[愛情] 心連心 (粵語): 3. 第五日
當我哋再見面嗰陣，我先發覺我哋比較似孖生，因為個樣有七八成似，高度又一樣，頭髮又差唔多。
佢一見到我，笑住話：「我哋好似孖生。」
我都笑咗：「好彩我哋唔係著一樣嘅衫啫。」
好奇怪，我見到對方用自己個樣，但係又唔係完全唔妥。
有可能係因為我哋幾似樣嘅關係，而我哋經開始過緊對方嘅生活，先至有哩個感覺。
佢突然間問：「係喎，我哋兩個同名，我哋點嗌對方呀？」
我突然醒起：「就算連英文名都一樣囉。」
我哋同時講：「Chris。」
佢話：「咁，我哋依家幫自己諗過另一個名俾對方用？最緊要係分到男女嗰種。」
咁又係，我問：「花名？」
佢話：「唔得，我哋就算中小學嘅花名都一樣㗎。」
我諗咗一諗：「真係。」
佢個性格實際仲有少少女仔性格喺度：「咁啦，我叫大恩，你叫細恩？」
都唔妥喎，我哋又同時出聲：「我哋連生日都一樣，唔通我哋真係孖生？」
佢話：「同埋查吓我哋出世嘅醫院，確認我哋係咪孖生。」
其實係咪我諗到嘅，同佢係同時間嘅呢？
佢突然講：「係囉。」
我嚇親：「喂，妳答緊我諗緊嘅嘢囉。」
我跟住話：「咁我哋其實唔駛出聲㗎喎，心靈相通得咁緊要。」
佢笑：「咪係囉。」我冇嘢好講。
我哋一路行，一路講我哋各自哩幾日發生嘅嘢。
例如我講咗我嗰日同啫梨小櫻行街嘅事，佢同我講我阿爸生日嘅事。
我哋係約埋食飯嘅，地方就喺嗰日間戲院附近。
直到我哋坐低，嗌埋一樣嘅嘢食之後，繼續我哋嘅日記交換。
佢話：「其實我哋可以唔駛報番各自發生嘅事俾對方知嘅，始終我哋係過緊對方嘅生活，越講只會越想返番自己嘅身體。」
我話：「咁又係，我哋始終仲未搵到換返身體嘅方法，咁樣都係一種唔係太好受嘅嘢。」
佢話：「其實就算我哋傾偈，都傾唔到太多，因為我哋雙方都好清楚對方嘅所有過往，怎至連唔講得嘅黑歷史。」
我同意：「係㗎，妳以前做過啲咩衰嘢，唔俾得任何人知嘅，我都一清二楚。」
佢話：「其實你都算乖仔架喇，唔似我。」
我知道，佢以前係霸凌過其他同學，唔少同學都驚佢，仲以為佢係屬於黑社會勢力。
食毒品，打交受傷家常便飯，但係直到遇到佢第一個男朋友之後，佢先收心養性。
我歎一歎氣：「唔好講以前啲嘢啦，已經發生咗嘢事，係成為咗歷史，點講點諗都改變唔到。」
佢話：「你講得啱，人要向前望㗎嘛。」
雖然我哋個樣、姓名、生日，怎至有時諗法差唔多，因為我哋兩個嘅經歷都唔同，所以喺大部分諗法都唔太一樣。
對感情、家人、朋友、自己，始終都係個別嘅兩個人，各自有獨立嘅考量同思想。
我哋知道對方嘅只係以前嘅事，而唔係對方依家嘅諗法。
對於感情，佢經歷得比我深，因為第一個男朋友嘅事，令佢唔想再相信男人。
第二個，只係一個陪伴性質嘅一個性伴侶，講真心？有嘅，少少咁囉。
而我自己拍過四次拖，由中學到大學第二年，一句可以總結：我哋唔夾囉。
佢一直望住我，搞到我唔好意思，好彩嘢食啱啱到，我先冇咁尷尬。
佢仲望緊我：「其實，當我今日再見到你，先發覺你好有吸引力。」
我俾佢嚇親：「唔好玩啦，妳咁講啫係讚緊自己啫，我係妳嚟㗎。」
佢眼神有啲認真：「唔係咁講，唔知點解當我係男仔嘅時候，見到女仔嘅你，我係心動嘅。」
我話：「咩妳咁直接？我仲未ready㗎喎，同埋，妳唔係女仔咩？」
佢諗咗一陣：「唔知點解，當我係喺你嘅身體嘅時候，有可能因為係男仔嘅賀爾蒙影響咗我？」
我都覺得好奇怪：「唔係呱？賀爾蒙？」
我諗一諗，不其然由枱底望去佢下半身。
果然。 佢呆咗咁望住我：「你做咩咁望我？」
我笑咗出嚟，用手指一指下面：「賀爾蒙呀！」
佢望一望自己，臉都紅埋：「妖，有冇搞錯呀？」
我笑到停唔到：「哈哈，扯晒旗啦，妳諗咗去邊呀？」
佢突然捉住我隻手：「其實你都知我哋兩個都屬於好大欲望嗰種嚟喎。」
咁又係，唔係佢同佢第二個點會有哩種關係。
而我，我揀女朋友都係先睇樣身材再落手嘅。
但係佢哩一捉，唔知點解我個心跳快咗，唔會呱。
我同佢講：「妳冷靜吓，唔好諗太多。」
佢捉得我隻手有啲緊：「其實你男仔嗰陣係咪好耐冇出？」
我話：「咁都唔係代表妳對我有感覺啫。」
佢低頭：「你講得啱，我終於發覺咗男仔獨有嘅問題。」
我話：「咁我哋食嘢先啦。」我要分散佢嘅注意力。
佢傻笑：「係喎，啲嘢食就凍啦。」
睇見佢個傻笑樣，我竟然有啲心動。
我哋跟住唔多點出聲，食埋個飯。
當我飲緊杯凍檸茶嘅時候，佢同我講：「唔好飲咁多凍嘢呀。」
係喎，女仔多數都唔飲凍嘢，係因為...
Oh my fucking god！
大大大大大獲...
大部分女仔有一樣嘢好準，哩樣係嚟M。
我仲啱啱知道我係要幾時嚟，聽日。
佢望住我：「你知要點嘅呵？」
吓？我本身係男仔嚟嗰噃！
佢好得戚咁笑：「好嘢，我依家係男仔，終於唔駛煩哩啲嘢啦。」
我話：「妳就得戚啦，如果我換唔返個身體，咪有排挨？」
我仲啱啱知道我個體質係，嚟親M都勁痛嗰種。
每次之前啲女朋友話有幾咁辛苦，我都會盡量幫佢哋舒緩痛楚，但係從來未感受過哩種痛㗎嘛， 佢哋多數痛起嚟都係捉緊我隻手，我痛極有限。
佢哋個個都會話，你哋男仔唔駛受哩種痛，真係要好好對我哋㗎。
哩次，我終於以男仔角度去體會女仔嘅痛楚啦（欲哭無淚）。
食埋飯之後，我哋再次返番去間戲院度，亦都睇咗場戲，見完出嚟咩事都無發生過。
我哋完全冇晒頭緒，都唔知點解我哋會交換咗身體，或者係靈魂交換。
唔係就真係咁啱因為我哋出生年月日同個名相同？仲要我哋連個樣都似七八成喎。
唔通因為咁多巧合就變成咁？
我哋之後去咗我哋出世間醫院，查一查我哋究竟係咪同一個阿媽生。
結果係唔一樣嘅，佢父母同我父母真係唔同人，反而知道我哋嘅出生時間係相差唔到一分鐘，個護士仲話好彩嗰陣手環係用數字，唔係用名，唔係連佢哋都好容易搞錯。
佢望一望我哋：「你哋真係好似係孖生。」
我哋真係冇晒辦法，我哋仲以為有希望我哋係孖生所以有哩個可能性，點知係錯晒。
唔知係咪我個身體係女仔嘅關係，唔知係咪女性賀爾蒙嘅原因，我出咗醫院門之後喊咗出嚟。
佢冇出聲，但係佢攬住咗我，由得我喊。
當我心情冇咁激動嘅時候，佢話：「唔知點解，我見到你咁，我好想保護你。」
我俾佢攬住嘅感覺，其實真係好舒服：「但係妳要先知道妳係咪鍾意我先，唔好因為見到我喊就咁講。」
佢放開咗我：「我都好想知。」
佢話：「咁，至少可以由朋友開始？」
我笑一笑：「我哋仲未知點嗌對方呀！」
佢拍一拍個肚：「一邊行一邊講，係時候醫肚。」
我跟住佢行：「唔，咁妳就叫肚餓恩啦。」
佢笑：「哦，咁你叫念親恩啦。」
我推一推佢：「妳笑我。」
佢掉轉頭：「咁冷嘅笑話你都笑。」
我話：「行啦，冷笑恩。」
食埋個飯，返到屋企沖涼嗰陣，我開始感覺到身體有啲未試過嘅感覺由下半身體內傳出，但係仲未見紅。
終於嚟啦，女仔嚟M嘅感覺。 我知道我係用衞生棉條嘅，我沖咗涼嗰一刻準備用嘅時候，我竟然分開咗雙腳呆咗喺度足足至少五分鐘。
我當然知道係要插入去，但係我竟然無從入手。
死就死啦，點都要用㗎。
我將支棉條放咗入少少，我唔覺奇怪，再多少少嘅時候，需要個身體開始彎少少先再可以夠角度，覺得可以再入多少少，我居然有啲臉紅耳熱，當我隻手指掂到下面，咁即係話終於推晒入去，我將條導管攞出嚟之後，竟然喺度唞晒大氣。
其實個感覺係唔算唔舒服，係冇咩感覺，但係我就一直諗住有支嘢插住咗，就經常想用力夾佢，但係我記得家姐講過，係唔可以用力，唔係之後就會血流成河，所以我盡量放鬆心情，等待風暴嘅來臨。