陸聿說: 心結

自從那天衝動地發出邀請後，我就陷入了天人交戰。早在當初發現自己心動的時候，我就不斷提醒自己，老牛不要吃嫩草，年齡的差距，注定了我們的人生步伐不會一致，就算在一起都會很容易分手，那倒不如從一開始就不要在一起。

然而越壓抑，心動的感覺就越強烈，昨天那四目交投的熾烈火花，她欲言又止的羞怯模樣，一整晚都在我的腦海裏揮之不去。

「喂，發咩呆呀？又掛住人哋呀？」身後傳來損友Kayla促狹的調侃。
「咁遲㗎你，買咗啲咩上去食呀？」
「登登登櫈！梗係燒肉加紅酒啦！」
「食肉獸，肥死你呀！」
「阿姐我一日嘅運動量多過你一年呀，排骨精！」
「運動？床上嗰啲呀？食肉獸！」


「好過你食都無得食！排骨精！」
「喂，你兩條友加埋都七張幾嘢啦，仲次次見面都撈亂骨頭！快啲上去啦，我好肚餓！」姍姍來遲的Liz，不改一貫的霸氣毒舌。

吃飽喝足，又到了談心時段。
「Cleo，溝女溝成點呀你？成日上網寫埋哂啲肉麻嘢，睇你都實食無黐牙啦！」Kayla和我取向一樣，不過她是pure，享受毫無負擔的open relationship，”認真便輸了”是她的座右銘。
「食食食，浄係掛住食！我仲煲緊，未有得食呀！」
「煲緊，即係你終於肯出手？」Liz總是能夠一下子就捉住重點，快狠準的切入，讓人措手不及。噢，差點忘了說，Liz有著濃厚的女皇屬性，是個毒舌又霸道的G，現正單身但追求者眾。
「唔知呀，佢咁細個，好有罪惡感呀...」
「食咗先算啦，上床唔夾就唔洗煩啦，即out!」Kayla還真是... 本性難移。
「其實正常人係有好感再相處一段時間之後先上床嘅！」為何我會和這大食色女做朋友，why!


「車！嘥時間！」Kayla甩了甩她那標誌性的大波浪長髮，一臉孺子不可教的模樣。
「你有無問過佢介唔介意另一半年紀大過自己？」Liz喝著紅酒，仍不忘一箭射來。
「無呀...」
「問吓啫，無壞嘅！可能嫩草想俾老牛食呢！你又唔係佢，憑咩幫佢決定？公平啲，俾個機會佢選擇。」女皇氣場太厲害，我一時之間竟無法反駁。
「叫你條𡃁去試探下囉！反正佢都知你鍾意幼齒㗎啦！佢叫咩名話？阿直？」Kayla終於提出了個正常的建議。
「點解我覺得你對Cleo條𡃁好似好有興趣咁嘅？幾時開始轉軚連B都照食呀？」Liz轉著酒杯，把矛頭指向Kayla.
「我諗住益你咋，女皇！一聽就知佢係太監style啦，啱哂你！」Kayla也不甘示弱。
「多謝喎，我成個後宮都係太監，多一個唔多，少一個唔少。Cleo，我覺得要試探就自己試，點可以斯斯縮縮假手於人㗎，未出手個勢都已經輸哂啦！」
「睇吓聽日有無機會啦，我會了解咗佢嘅諗法先再決定下一步。仲有呀，我唔係鍾意幼齒呀！」
「打鐵要趁熱呀怪叔叔！蘇州過後無艇搭！」完全無視我的反對，Kayla拍著我的肩，替我起了個新外號。


「嚟！為怪叔叔成功推倒幼齒干杯！」連Liz也加入了起哄。這兩個瘋女人...

仰首喝盡杯中酒液，我開始有點期待明天的約會了...