陸聿說: 番外（1）The other side of the day

「阿直，師傅頭先發我脾氣呀...」第一次被師傅趕出去，Jasmine立刻找最有可能猜到師傅想法的人求救。
「吓？！大佬竟然發你脾氣？你做過啲咩呀？」忙得頭昏腦脹的阿直，剛歇下來喝杯水就收到Jasmine的求救訊息。
「我見今朝冇乜嘢做，咪入去撩吓佢傾計囉... 我問佢點解你哩排咁忙，佢竟然用開大會嗰啲bossy style嚟反問我係咪有嘢唔明，點解要搵你... 我以為可能係你做錯嘢激親佢，佢又話唔係，之後仲趕咗我出房...」阿直是唯一知道她少女心事的人，上次吃buffet時還特意跟她分享師傅的喜好和弱點，讓她這段時間得以慢慢和師傅拉近距離。在Jasmine心中，阿直儼然已經成了她的愛情顧問。
「我諗住陣間收工返公司樓下間茶檔買外賣，到時再慢慢傾啦！」大佬竟然發Jasmine脾氣！一定要去收吓風，萬一踩中地雷就死硬！阿直心𥚃暗想。

「我頭先好認真咁幫你諗過，大佬可能係...呷醋！」阿直拿著飯盒，和Jasmine坐在公司樓下的平台花園，開始了愛情顧問的輔導課。
「呷醋？呷你醋？」Jasmine一臉的不可思議，她也確實沒有往這個方向想過。
「你諗吓，今朝你特登入房搵佢，竟然唔係關心佢而係關心我喎！你哋係咪成個對話都係關於我先？」
「又好似係喎！咁即係話，師傅應該都有啲鍾意我？」這個猜想讓Jasmine整個人都明亮起來，一開始時的苦惱和消沉已經消失無蹤。
「表面證據成立！」佢擺明鍾意你啦，遲鈍怪！不過我唔可以講俾你知，如果俾大佬知道我搶咗佢表白嘅機會，佢一定會扭甩我個頭！阿直在心𥚃哀歎著。


「如果真係因為呷醋... 咁我.. 就原諒佢啦！」Jasmine輕咬著唇，微色微紅的低聲說著。
「扮哂嘢，你根本都唔捨得嬲佢！」看到Jasmine重展笑顔，阿直鬆了一口氣。

八點多了，阿直見時侯不早，便提議送Jasmine到附近的巴士站，兩人邊走邊聊，停在十字路口等紅綠燈時，剛好說到Cleo從前剛升職時的糗事，惹得Jasmine哈哈大笑。這一幕，剛好落在同樣在等紅綠燈的Cleo眼中。還是阿直眼尖看到Cleo的車，正打算揮手打個招呼，Cleo卻猛的踩下油門，絕塵而去。
「今次大鑊喇... 補救！一定要補救！點樣補救好呢... 一定要同大佬解釋返件事，再同佢講Jasmine因為佢而好唔開心，喊濕咗幾包紙巾！大佬應該會好心痛跟住去求和，再進取啲甚至會直接攤牌，係咁就正喇！我簡直係個天才！哇哈哈！」阿直沉浸在自己的幻想中興奮不己，令人意想不到的是，她幻想中的劇情竟然真的發生了...