魔獸工作室: 封號

方鴻漸用鑰匙打開工作室單位的大門，信步而進。向清秋和凌禁正盯著辦公桌上的一個螢幕，神色凝重。

鴻漸(擠出一抹笑容，嘗試緩和氣氛): 「今日好似唔係我值更喎？咁急叫晒我哋嚟，有咩事？」
 
凌禁(把鴻漸拉到螢幕前): 「你睇下我Cap落嚟嘅客服訊息。」
 
鴻漸(照直讀出，面色漸漸發白): 「你帳號內的角色多次被舉報使用未授權的第三方作弊軟體，這違反了本公司的使用者條款，因此必需很遺憾的通知你，此帳號已被永久凍結……頂！發生咩事？！」
 
清秋(不好意思的補充): 「唔止呢個號，所有用同一個外掛嘅帳號都畀人Ban晒…」
 


鴻漸(情緒低落): 「我唔明，點解會咁？明明我哋已經用咗VPN加密IP地址，點解會一鑊熟？」
 
清秋(咬牙切齒): 「我唔明白營運方係點樣查到我哋個真實IP，但我知道係邊個舉報嘅。」

■■■■■■

時間回到兩日前，虛擬世界，燃燒平原。

這是一片火山密布的荒野，大地在高熱的炙烤下呈現焦黑色，四處都是冒著氣泡的熔岩池。在一座活火山的山腹處，四、五個名字裡帶「麥田」的遊戲角色正用機械化的動作重複擊殺著赤裸上身、紅皮膚的巨魔。這時，一個矮人族的獵人玩家帶著一頭寵物老虎來到山下，也開始清理起山腳的巨魔，怪物刷新的速度不算快，他打著打著就來到「麥田」角色活動的山腰附近……



矮人獵人(好奇的對一個「麥田」角色揮了揮手): 「安安，你哋個名咁似，係同宿舍嘅老死定係親兄弟啊？」

「麥田」角色是外掛控制的機械人，當然不會回應他，繼續自顧自擊殺著怪物。

矮人獵人(開始不耐煩): 「喂喂，聽唔聽到我講嘢，你哋咁冇禮貌嘅？」
(又觀察了一會): 「喔我知啦，你哋根本唔係真人，全部都係機械人！」

矮人獵人開始徘徊在「麥田」角色周圍，搶先攻擊起程式選作目標的巨魔，這樣的行為一直持續了15分鐘之久。

場景回到現實，向清秋捧著一碗泡好的杯麵來到辦公桌前，看了看所屬打金角色的背包，發現金幣還是近半小時前那個數量，然後很快注意到矮人獵人惡意搶怪的行徑。



清秋(拍桌大罵): 「頂，邊條食飽飯冇野做嘅粉腸，阻住我地做生意。」

清秋手動控制起其中一個「麥田」角色……

清秋(「麥田」角色)(對矮人豎起中指): 「你個死矮仔，有種留低唔好走，我開個大號嚟車爆你。」

清秋一說完，便操作旁邊閒置著的一部電腦，登入自己部落陣營的帳號，選了個60級滿級的獸人術士「無底天坑」登入。

清秋從城鎮的飛行點騎上雙足飛龍，很快就來到燃燒平原的巨魔山。眼見矮人獵人無視自己的威脅，依舊在獵殺著巨魔，清秋冷笑，召喚出長著肉翅和山羊蹄的魅魔寵物，一個「魅惑」技能控制住矮人，接著詛咒、暗影箭輪番使出，矮人瞬息間就倒在地上、成為一具屍體。

清秋(無底天坑)(對矮人屍體吐口水，跳起難看的舞蹈): 「點樣啊？啱先唔係好得戚嘅咩，我同你講，無論你復活幾多次，我都會守喺你條屍度，殺到你刪號為止。」

矮人獵人(躺屍，不敢復活): 「好，你等級高，我打唔過你，但係你啲帳號用外掛，我一定檢舉你！」



說完，矮人的屍體憑空消失了。

清秋(無底天坑): 「哼，竟然直接Offline，懦夫！」

■■■■■■

聽向清秋複述完「事發經過」，眾人面面相覷，沉默良久。

凌禁(歎氣): 「今鋪我哋冇咗三十幾個帳號，用喺呢啲帳號上面嘅90日遊戲時間儲值，全部報廢，單睇呢層已經損失過萬……」
 
鴻漸: 「呢批打金角色花費咗唔少時間升級，喺重新培養起呢啲「營生工具」之前，我哋大部分業務都會停擺。」
 
清秋(面色沉重): 「不如散水啦，依家我哋投入唔算大，仲嚟得切止蝕。」
 
鴻漸: 「清秋，今次只係個別事件，唔代表我哋個模式出咗問題。我有啲諗法…以後所有帳號改用30日嘅時間儲值，降低風險；另外，所有開外掛嘅角色都去偏僻啲嘅地方活動，減少目擊率……」


 
清秋(稍稍冷靜): 「鴻漸，往往係呢啲時間，你都係最靠得住嗰個。」
(眼神轉陰狠): 「我記得條友公會名叫『硬頸花園』，我要喺遊戲開個40人嘅團隊，殺到佢哋叫阿媽…凌禁，你都嚟幫手。」
 
凌禁: 「冇問題，我要佢哋為我哋損失嗰皮嘢付上代價！」