魔獸工作室: 改良外掛

午飯時間，鴻漸、清秋、凌禁三人聚攏在辦公桌旁，正執筷啃著外賣的燒味飯，鴻漸表情彆扭，嘴角似有弧度但眼神憂鬱。

鴻漸(唉聲歎氣): 「弊啦……」
 
凌禁: 「又咩事啊？」
 
鴻漸: 「我好似鍾意咗一個人，但唔知係男定女。」
 
清秋: 「哈哈，係咪遊戲入面嘅妹妹啊？」
 


鴻漸: 「佢模板梗係女㗎啦，但你都知道，虛擬世界嘅性別邊信得過呢…」
 
凌禁(淡然調侃): 「G.I.R.L，guy in real life。」
 
清秋: 「講多啲啦。」
 
鴻漸: 「我送咗好多虛寶畀佢，而且同佢玩嘅時候，個心成日扑扑咁跳。」
 
清秋(豎起拇指鼓勵): 「問下佢住邊，如果喺香港，就約出嚟『面基』。我知道你因為聖誕舞會嗰單嘢，對愛情好有陰影，無論點我都會支持你嘅，就算你要出櫃……」



鴻漸: 「頂你個肺，你唔畀『法包』佢真係女仔？」

這時，門鐘響起。

凌禁: 「係啦，弦思知道咗封號件事，話今日嚟睇睇。」
 
清秋(放肆): 「女仔？係唔係豬扒？」
 
凌禁(沒好氣): 「唔係，普通女仔嚟。」



凌禁說著起身，到門口把宋弦思領進來。弦思挨個房間逛了一下，最後坐到一張轉椅上，晃著手指，指頭掛著的USB手指打著旋。

弦思: 「唔介意嘅話，我想copy下你哋個外掛，同埋睇睇實際運行嘅效果。」
 
鴻漸: 「冇問題，跟我嚟。」

鴻漸帶著弦思來到自己的辦公桌前，螢幕中的「麥田」角色如常動作笨拙的自動殺著怪，他讓弦思把USB插入插槽，打開一個資料夾開始傳輸檔案。

弦思(盯著螢幕，若有所思): 「嗯嗯，原來係咁…」
(搶過滑鼠): 「借過借過……」

弦思拉開鴻漸，滑鼠按動幾下，就打開了一個滿是程式碼的介面，開始掃讀外掛程式的語法。

弦思: 「我嚟之前研究過隻Game嘅機制，你哋用緊嘅外掛其實有啲簡陋，例如魔力用盡之後竟然唔識自己飲水恢復，而係企喺度齋等……咁樣唔單止效率低，而且外人見到會覺得好奇怪。」



鴻漸(點頭): 「同感，通常一眼睇唔出嘅話，見到『怪區』畀人霸住，普通玩家就會自己過主。」

弦思: 「仲有啊，乜你哋以為用咗VPN就可以百分百隱藏IP咩？人哋咁大間公司，真係要查有幾難呢？」

鴻漸: 「咁點算啊，宋大小姐？」

弦思(得意一笑): 「嗱，等我幫你哋改良下個外掛，你哋以後都盡量用收費嘅VPN，咁就安全得多啦。」