黑魔后: 慶功宴（下）
慶功宴的晚上，Liz百無聊賴的坐在一角看著台上的Zico主持遊戲。
「Liz，Roger請你過去。」是Roger的秘書Mable。
「唔該晒你，Mable。我有啲嘢要同Liz傾。」Roger讓Liz在自己身邊坐下，支開了Mable.
「Liz，你覺得Zico點呀？」Roger開門見山的問道。
「咩點呀，咪又係人一個。」Liz的回應還是一如以往的波瀾不驚。
「你今日個妝唔同咗喎，髮型都唔同咗！我之前同你講過好幾次，叫你著得light啲你都唔理我，而家識咗人哋幾個月就肯聽人哋講，拍拖又唔話我知，唉，女大女世界，唔洗理我哩個Uncle喇...」Roger故作傷心狀。
「Uncle，我冇拍拖呀！你話㗎嘛，化妝化light啲唔好俾咁大壓力佢哋吖嘛，我就係聽咗你講所以先改咗個妝呀！」Liz喝著香檳，略帶心虛的安撫著Roger。這個Uncle就像個大細路，老愛裝模作樣的騙取她的同情心。
「你唔好當Uncle老眼昏花，女為悅己者容，我明嘅！但係你拍拖要同Uncle講吖嘛，等我同阿哥阿嫂有個交代！」Roger邊說邊搭著Liz的肩，一副語重心長的模樣，眼角卻瞄著stage的方向，如願看到某主持人殺人的目光。
「我真係冇拍拖呀！」Liz拿起酒杯一飲而盡。
「因為你Daddy件事？Liz呀，人有好多種，唔係個個擅長Social嘅人都會好似大哥咁... 你都唔好因為你Daddy嘅錯而一竹篙打一船人，哩個世界上仲有好多專一嘅人，如果佢真心對你好，你就俾個機會佢，亦都俾個機會你自己啦！」Roger邊說邊替Liz把酒添滿。殺人的目光又來了，嘿嘿...
「跟住落嚟，有請GM Roger同大家講幾句！」 台上傳來Zico的召喚，小傢夥轉數挺快的嘛，希望你接下來的表現不會令我失望！
完場時Zico及時抱住了醉倒的Liz，這一幕同時落入Roger的眼中。他狀似無意的走了過去...
「Zico，唔該晒你睇住Liz。交俾我啦，等我送佢返屋企。」Roger伸出手，打算從Zico手中接過Liz。
「唔洗咁客氣啦Roger，舉手之勞啫！我無飲酒，等我送佢得㗎喇。」Zico不著痕跡的婉拒著，而Roger仍伸著手，氣氛開始變得尷尬。
「我話等我送佢返去，交俾我啦！」Roger的聲音裏多出了不耐。
「多謝Roger你嘅好意，不過你飲咗酒，唔方便揸車，所以都係等我送Liz返去啦！」Zico分毫不讓。
「我有司機，唔洗自己揸。而且，只有我知道Liz住喺邊。」Roger露出得意的笑容。
「但係Liz需要嘅係我。」Zico側過身，讓Roger看到Liz仍然抓住自己領呔的手。「我會陪住佢，等佢清醒啲再送佢返屋企。」向來處事圓滑的Zico竟一反常態，變得強硬起來。
「唔洗咁麻煩，我話由我送就係由我送。最多車埋你。跟我嚟。」Roger畢竟長居高位，脾氣上來了Zico也不好再拒絕，而且有自己跟著，Roger應該也下不了手... 權衡利弊之後，Zico抱著Liz跟了上去。
「Zico，你記唔記得我姓咩呀？」Roger坐在副駕駛座，好整以暇的問著，好像剛才的碰撞根本沒有發生過一般。
「姓鍾。」在後座照顧著Liz的Zico也維持著禮貌，淡淡的回應著。
「咁Liz呢？」Roger唇邊露出狐狸般的笑容。
「都係姓鍾。」Zico坐直了身體，不會吧... 兩個人都姓鍾，難道...
「Liz係我侄女。我無結婚，阿哥個女就係我個女。」答案揭曉，Roger在倒後鏡中看到Zico俊臉微紅的樣子。
「喔。」原來誤會了... 「頭先唔好意思呀Roger，我以為...」
「以為我為老不尊？哈哈哈！」Zico面露窘色，搔著頭，不知如何接下去。「頭先你做得好好。如果你因為我係GM就將自己鍾意嘅女人拱手相讓，咁你就無資格坐上我架車，我會將你調返英國，等你以後都見唔到Liz。」Zico擦了一下額際並不存在的冷汗... 好險！竟然是來自長輩的考驗... 幸好自己有堅持下來，否則就算兩情相悅，她家人那關也一定困難重重， 果然姜是老的辣！
車程不長，Roger把Liz的門牌告訴Zico之後便離開了。抱著Liz回家的時候，Zico聽到她在半醉之間的喃喃囈語...「衰人... 你同Daddy一樣... 同Daddy一樣... 去到邊度都被女人圍住... 到處留情... 衰人...」
這，就是你對我若即若離的原因嗎？
「我唔會呀，Liz，我唔會。」Zico把她放在床上，輕輕吻去她眼角的濕意。
「你保證...」喝醉了的女皇，有些可愛呢！
「我保證！」明知Liz並不清醒，Zico還是鄭重的承諾著。Liz似乎聽到了她的回應，伸出雙手把她拉近，在Zico驚訝的目光中吻了她... 然後... 就沒有然後了，因為Liz醉倒了，不省人事的那種。Zico苦笑著站在床邊，她懷疑Liz明天醒來之後是否還會記得剛才的吻... 明明只是蜻蜓點水的輕觸，卻讓Zico再三回味...
甚麼時候，她才願意清醒著吻我呢...