不如我們分開一年，好嗎？: 第二章

眨眼間，這個為期八堂的課程，已到了最後一堂。換言之，我應該沒有太多機會見詠琳了。

既然是最後一課，老師也公佈了結業功課。

「各位同學，你地嘅結業功課，就係要交一篇起碼三萬字嘅小說畀我。」老師說到這裏，全場譁然。怎麼可能憑空寫出三萬多字呢？

「大家唔使咁擔心，你地有兩個月時間去做，一月尾先使交功課。而且今次呢個功課，係兩個人一組，即係你地要搵一個拍檔，合二人之力去寫一篇小說。二月十號會有一個分享會，到時我會派返你地嘅功課，同埋選出一篇我認為寫得最好嘅小說，兩位作者將會有獎勵，大家加油呀！」

依舊坐在我身旁的詠琳立即問我:「我地兩個一組？」



我點了點頭。「好呀！」

然後我們交換了電話，打算夜晚再商量。果然，詠琳在我剛洗完澡就whatsapp了我。

「Hi我係詠琳 :) 有冇咩idea」

「有好多諗法，唔知寫邊個」我回答。

「不如大家將自己諗到嘅嘢講出嚟？」



然後我們千辛萬苦，終於決定寫一個名為《不能見面的女朋友》的小說。

決定好題材，就開始要動筆寫了。本來我以為兩個人寫一篇小說，是不可能的事，因為我們都會有各自的想法，怎麼可能合二為一呢？

但是經過這兩個月，我發覺我跟詠琳真的投契得很，大家的想法很相近，也因此寫作進度比預期中快。我把完成了的作品看了又看，對自己感到滿意。

「不如我地搵日食餐飯？當係慶祝我地咁辛苦寫完一篇小說！」詠琳提議。

詠琳是個樣貌姣好的女子，縱使我比較內向，也很難不對這個邀約心動，便答應了她。我們決定在分享會結束後去吃飯。



＊＊＊

終於到了分享會那天，我心情莫名其妙地緊張。到底是因為今天要公佈最佳小說是哪篇，還是今天是最後一次我能見到詠琳呢？

「我已經好認真咁睇晒大家嘅小說喇。大家嘅表現比我想像中都好，不過其中有一篇對於我嚟講係特別突出。嗰一篇係愛情小說……」

聽到愛情小說四個字，我立即望向詠琳，而詠琳也同一時間看著我，我們相視而笑。

不過很可惜，那篇愛情小說不是我們的那篇。但沒打緊吧，最重要還是寫出一篇令自己滿意的作品。

「食飯喇！」分享會結束，詠琳開心地跟我到了附近的一間餐廳吃飯。

「啱啱呢個新年假我做咗好多嘢呀！我去咗日本個Hello Kitty Land，嗰度有好多melody公仔，我最鍾意就係melody喇！」詠琳滔滔不絕跟我分享自己在新年的經歷。「係咁你新年做咗啲咩呀？」

「我無去旅行，留咗喺屋企睇書。」不是我不想多說一點，但這十多個字已概括了我整個新年做過的東西。



「點解唔約朋友出去玩嘅？」她好奇地問我。

「因為我好內向，冇乜朋友。」我坦白地回答。

「去識多啲朋友啦，同朋友一齊玩好好玩㗎！況且識多個朋友，對你都唔係一件壞事呀！」

有人說，若果你願意為一個人作出改變，那麼那個人必定是對你很重要的人。而我，就因為詠琳這一番話，從一個內向的人，變成一個願意社交的人。