不如我們分開一年，好嗎？: 第五章

「你而家去邊度呀？」詠琳問我。

「我去嗰邊搭巴士返屋企。」

「我都喺嗰邊搭巴士喎，一齊行囉！」

我肯定詠琳是真心很喜歡這份禮物，因為她立即把新手錶戴上，而且在路上她也一直在傻笑。

走到巴士站……





「咦？你都係搭呢架巴士嘅？」我們的學校在港島，而我住在新界，按道理應該很少人跟我一樣這樣跨區上學，可是詠琳跟我排在同一條隊。

「係呀，你住邊㗎？」她問我。

「我住XX大廈，喺沙田。」

「吓？？我就住你隔離嗰棟大廈咋喎！」她驚訝地說。

猜不到，我倆竟然如此有緣。





「真係㗎？但係平時返學好似唔見你嘅？」

「因為平時返學都係我爸爸車我，不過放學我就要自己搭車返去。」

「原來係咁……」

巴士來了，我們雙雙上車。我把靠窗的位置留給她，自己坐在路口位。

「坐埋便安全啲。」我跟她說。





「你好細心。」她甜絲絲地說。

平時我獨個搭車，最愛便是一邊聽著音樂，一邊看著車外掠過的風景，因為這樣給了我一個私人空間，讓我內心能築起一幅牆，在牆上畫滿了自己希冀的影像。外間不能干擾我的思想，也是我真正自由的時間。

可是現在詠琳坐在我身旁，我當然希望能夠和她談話，無奈我實在不懂如何打開話匣子……

「唉，嚟緊呢個星期好忙呀！」她略帶不開心地說。

「有好多測驗？」

「其實唔係好多，不過我有其他唔同嘢做……下星期有個小提琴比賽，我仲未練得好熟。」

「我下星期都有小提琴比賽喎！」

原來我們兩個巧合得報了同一組別的比賽。





「係咁不如我地喺比賽前一日一齊出嚟練習？大家都可以幫對方聽下，睇下有咩嘢要改善。」詠琳提議。

「好呀！」既然有多一個機會和她相處，我當然立即答應。

「但係去邊度好？我屋企有人，唔係太方便上嚟……」

「你唔介意嘅，可以去我屋企。」

「好呀，就咁話啦！」

然後我們也沒有多談了，因為詠琳很累，想要休息一下。

我偷偷地看著她睡覺。我還是第一次這麼認真地看著她。她的皮膚很白晳，有個高挺的鼻子和櫻桃小嘴，是個讓我看到就想吻下去的女生。





你問我想不想睡覺？

比起睡覺，我還是較喜歡看著她。

巴士差不多到站了，詠琳仍然在酣睡。

「到站落車喇。」我溫柔地提醒她。

「唔。」她無意識地發出了聲響，絲毫沒有睜開眼睛的打算。

「真係要落車喇！」

她這才睡眼惺忪地站起，但碰巧巴士要停車，她一失平衡就要仆到了，我立即捉著她的手。

「唔該。」





我忽然發現我的行為是多麼大膽，不過她好像滿不在乎。

下了車，我們也要分道揚鑣了。

「拜拜喇，我哋星期日見！」

「再見！」

喜歡一個人，就是跟她說再見時，你恨不得下一秒就能再見到她。