到了夜晚九時左右,我們終於頂不住要去吃飯。

「食埋飯先返屋企啦好唔好呀?」詠琳問我。

「好呀。」我怎會拒絕呢?

我們去了灣仔的三六九飯店,那是一間舊式上海飯店。

「兩個拖友……嗰邊啦,最啱二人世界!」一個上了年紀的侍應指示我們坐在角落的位置。



我們不是在拍拖……雖然我想。我偷偷地看著詠琳,她好像完全沒有澄清的打算。

這代表我有機會嗎?

我們隨便點了幾個菜。吃什麼其實不太重要,跟誰吃才是重點。

「你好似都仲係冇乜點變喎,同以前一樣唔鍾意講嘢!」詠琳又再負起打開話匣子的責任。

「有時唔知講乜先好。」我說。「講多錯多。」



「乜你唔覺得咁樣會好悶㗎咩?」

她想要暗示我很沉悶?糟糕了。

「你係咪覺得……同我一齊好悶?」我戰戰兢兢地問。

「哈哈!」她笑了。「咁你覺得我點解要同你去書展?」

我尷尬地笑了笑。



「其實你真係好白痴!」

「係咩……?」

救命,為什麼我總不能把話題延續下去????再是這樣下去,她早晚會覺得我很悶。

「好喇喎,我今日呢就陪咗你呢個白痴去書展,係咁你係咪好應該搵一日陪番我,做我想做嘅嘢呢?」她淘氣地說。

她是在給我一個機會?

「好呀,我成個暑假都冇嘢做。」

「係咁講好咗喇!不如就下個禮拜二?」

「好呀。其實你想去邊?」



「我驚咁早講咗你會唔肯陪我喎!」

「應承咗會陪你就會陪啦。」

「你份人真係好得意!」她忽然這樣說。「明明就好為人着想,但係又要表現到好冷漠咁。」

「係咩……」

「我想去迪士尼,你陪唔陪我吖?」

「陪!」

「嗰日呢……你可唔可以去我樓下等我?」



這樣簡直就是女朋友叫男朋友接她出去!

「好呀。」

「因為我爸爸嗰日都要去公幹,所以佢去機場之前可以順便車埋我地去。」

我沒想到事情居然變成這個模樣……這麼快便要見家長?萬一她爸爸不喜歡我,怎麼辦?

不過我總不可能打退堂鼓,讓詠琳覺得我很懦弱。

「唔該晒。」

吃過飯,我們也一起乘車歸家了。

「係咁下星期二見啦,我行呢邊呀!」詠琳說。



「我送到你去樓下先啦。」我說。

「唔使啦,而家都咁夜,你快啲返去休息啦!」

「就係咁夜先要送你返去。」

「咁樣麻煩到你呀!」

「行啦。」

她很聽話地讓我跟著走。

「你真係可以做我保鑣!」她笑着說。「你好識照顧人。」



「男仔係咁架啦。」我這樣回答她。其實我真正想說的是:「咁你願唔願意俾我照顧你?」

「係喎,頭先啲相記住唔好post出去呀!」她忽然這樣叮囑我。

雖然我本來就沒有打算公告天下,但……為什麼不可讓人知道?

她這句立即把我擊沉,我沒有回話。她奇怪地看了看我。

「你真係唔鍾意講嘢喎!」

我依然不想說話。

「不過我鍾意。」

到底她在想什麼?

「到喇,你快啲返去休息啦!我地星期二見!」

「拜拜。」

我看著她的背影。妳到底……是不是對我有感覺?