不如我們分開一年，好嗎？: 第十四章

我給詠琳這麼具哲學性的回答弄得我糊裏糊塗，但是我又不好意思再追問，因此唯有回到學校後和文謙討論。

「你唔明白佢嘅答覆？」文謙問我。

「明我就唔會問你啦。」

「其實都唔係太難理解嘅。」文謙解釋。「佢嘅答覆，即係佢而家嘅感情狀況；但係講到最尾，你追唔追佢，都係取決於你心入面點諗。你係好鍾意佢嘅，你會不惜一齊咁追佢；如果佢真係好鍾意你，就算佢而家有男朋友，都會好快散。所以我估佢咁講……其實係想知道你係咪真係好鍾意好鍾意佢。」

「原來係咁……」給文謙這樣說一說，又真的好像清楚了很多。



「但係佢咁講亦都同時代表咗一樣嘢。」文謙回答。「佢應該知道你鍾意咗佢。」

「唔係掛……」給詠琳知道了我暗戀她，然後我們還要每天也若無其事地一起上學，整件事真的弔詭得很。

但是反過來說，她知道我喜歡她，仍然願意跟我一起上學，可能……我真的有機會？

不知是否被這意識影響，我居然開始敢於和她一樣，偶爾拋出一些有點曖昧的問題或答案。

「今日有無朱古力食？」又是新的一天了。



「你好想食朱古力咩？自己去買囉！」詠琳笑說，但又同時拿出朱古力給我。

「唔係餵我㗎咩？」我大膽地問。這已經是我生平最勇敢的一次了。

「好呀，呀~~」

我吃過她的朱古力，滿足地笑了一笑。「日日都食我啲朱古力，俾你食到我破產喇！」

我聳聳肩。「我食唔食你都係會買架啦，唔好賴得就賴喎！」



「俾你識穿咗添……」詠琳扁扁嘴。

「不過我唔係咁衰嘅。」

我翌日就買了一包M&M給她。

「咁無誠意嘅……」她說。

「吓……」

「你就要我餵你，然後你自己就揼低一包俾我就算……」

我暗感喜悅但也有一點點無奈地拆開包裝，拿出一粒。

「咁細粒……」



我只好倒了幾粒在手掌上，然後……

她直接從我手中叼走那幾粒M&M，使我的手掌沾了她的口水。我呆立當場，不懂反應。

「M&M都唔錯喎，下次都可以買下！」詠琳笑說。

這樣可算是進度良好？

自從這天以後，我們每個早上都會互相餵對方吃朱古力。這真是甜蜜得很。

「快啲同人表白啦！咁佢咪名正言順係你女朋友囉！」文謙慫恿我。

「咁快？」



「時機適合就無所謂啦，況且你地都識咗大半年啦。」

「但係無端端表白真係好奇怪……」

「佢唔係約你生日出嚟咩？係咁就嗰日表白？」

「考慮下啦……」

然後我又掙扎了一整天。雖然我也認同表白時機差不多成熟，但是我真的不夠膽……

「好心你啦，夠膽餵人地食朱古力，唔夠膽同人表白，你想點呀？」我問自己。

也許一生人最大的掙扎，不是要決定自己前途的時候，而是要決定應否表白的時候。

最終，我下了個決定。