不如我們分開一年，好嗎？: 第二十四章

二月十號，對我和她都是一個特別的日子；而四天後就是另一個特別的日子了。

「情人節快樂喎！」今天早上詠琳跟我說的終於不是普通的一個早安。

「情人節快樂。」

「今晚有冇約人呀？」

我不知道詠琳為什麼要這樣問我，她又不是不知道我喜歡她……





「都係同屋企人食飯囉，冇乜特別。」

「既然冇乜特別，我就俾個特別嘅情人節嚟啦！今晚唔好陪你屋企人，陪我食飯！」

什麼？詠琳約我在情人節吃飯？

我當然是二話不說答應了。

「不過你今日唔好等我放學喇，你知啦，如果你企喺我學校門口等我……全世界都會知道咩事。」





雖然詠琳約我在情人節吃晚飯，已經是證明她也喜歡我，但是聽到她叫我不要等她，心底裏還是不爭氣地呷醋。

「好啦，咁我返屋企等你啦。」

不知道今晚會是怎樣呢？詠琳會不會親口答應當我女朋友？我們今晚能有一些更進一步的行為嗎？

回到學校，我立即把這件事告訴文謙。

「恭喜晒！」他好像比我更興奮。「係咁你之前一切嘅煩惱，應該都冇晒啦？」





「都唔係架……我都一樣會諗，不過無論如何，睇嚟結局都唔錯。」

放學後，我立即返回家中，把要做的功課都做完，然後靜靜期待著今晚的來臨。

「我都ready喇，你去我樓下等我啦」終於電話傳來詠琳的whatsapp。

我到了詠琳家樓下，她很快也出現了。她今天穿得比任何一次也輕便，彷彿是來不及出門口而隨便穿著什麼的。她剛才不是說自己預備好的嗎？

「今晚上嚟我屋企食飯，我煮俾你食。行喇！」

甚麼？！？！？！

我頓時緊張了十倍，為什麼我會忽然有機會上詠琳的家的？

「唔使咁緊張喎，我之前都上過你屋企啦！」





「又係喎……」

詠琳的家很大，我想應該是我家的兩倍。她的家的裝潢挺美侖美奐，而且收拾得很整齊，簡直和我家是兩個世界。

「隨便坐啦，唔使客氣喎！我屋企人都唔喺度。」

我戰戰兢兢地坐在她的沙發上，而她就走了進廚房。

「我唔係學煮嘢食學咗好耐咋，所以如果唔好食都唔好介意！」詠琳在廚房裏笑著說。沒多久，她就捧着兩碟食物出來。一碟是煎銀鱈魚柳，另一碟是牛扒。

「望落去好似唔錯喎！」我說。雖然我還未試味，但是光看下去就覺得有一定水準。

「因為今日冇乜時間煮餸，所以淨係預備咗呢兩碟，不過我仲煲咗好大煲飯架！」詠琳笑說。





只論食物質素，我覺得真的很好味；但這餐是詠琳煮的，那就肯定是我人生中吃過最美味的晚餐。

吃過飯後，詠琳也要開始做功課了，我就替她把碗碟洗好。

「啲碗碟我幫你洗好㗎喇。」

「唔該哂呀！」

「係咁我唔阻住你做功課喇，多謝你煮咗餐飯畀我食！」

「不如呢……你陪我做多陣功課先啦！」詠琳嘰嘰笑着。

＊＊＊

不過與其說是我陪她做功課，倒不如說是她打開功課跟我談話。





「你知唔知呢……除咗我屋企人之外，你係第一個人我會煮飯畀佢食！」

「你煮得好好味。」

「梗係啦！」

我們談到接近十二時，我才捨得離開。

「我地聽朝見啦，拜拜！」

「拜拜！」

回到家中，我在外衣的口袋找到一張字條。





「下年到你煮俾我食！

詠琳」