不如我們分開一年，好嗎？: 第二十六章

等待是漫長的，特別是當你正等待自己喜歡的人。我看著手錶，時間一點一滴地溜走……

「Sorry呀我今朝唔知醒！」詠琳趕忙地跑過來。

看見她，我還是什麼鬱悶也消除了。

「我地要行快啲喇，安排咗好多行程。」我沒有給詠琳喘息的時間。

我們首先到了茶樓喝茶。





「你真係好老餅！」詠琳笑說。「你睇下呢度啲人平均年齡大我哋五十年！」

「你唔覺得飲茶好舒服咩？日日生活都咁趕忙，飲茶可以俾我地慢慢坐喺度食一餐。」

「係咁你又話今日有好多嘢做？」

「所以你快啲叫嘢食啦。」

喝過茶，我們正式開始今天的行程。





「又嚟海傍？」我們第一站又是返回尖沙咀海傍。

「呢度多回憶吖嘛，況且日頭嚟同夜晚嚟，睇到嘅景色好唔同。」

今天有點雲，也有點涼風，白天站在海傍也不覺熱。

「不過今日就需要影相喇！」詠琳邊說邊掏出電話。「因為我覺得你今日會帶我去好多地方，所以為免我唔記得去咗邊度，我都係影低晒佢記住先！」

來到尖沙咀海傍，下一站就當然是搭天星小輪過中環。





「之後我地去邊呀？」

我沒有回答她，只是帶她穿過大街小巷，就到了下一個景點--石板街。其實石板街我已經來過很多遍，可是每次都是單純路過而沒有特別停下。今天便不同了。

「我真係咁大個女都未嚟過呢度喎！點解條路咁得意嘅？」

「因為呢條路好斜，所以起嗰陣就用一塊塊石板疊住咁鋪成一條路，又方便到行人，落雨嗰陣又好容易咁跣走啲雨水。」

接著我們去了山頂。

「我細個嗰陣好驚搭山頂纜車架！」詠琳說。「因為中間嗰段好斜，我成日都好驚會碌咗落去！」

「咁你而家仲驚唔驚吖？」

她搖搖頭。「有你喺度。」





從山頂鳥瞰維港，真有大地在我腳下的感覺，和在海傍欣賞景色是兩碼子的事。

「呢度係最尾一個市區景點，跟住我地就會去爛頭島喇。」我說。

「爛頭島？咁似以前獎門人嗰啲估地方名嘅答案嘅？」

我輕輕地笑了。「爛頭島即係Lantau Island呀。」

「哈哈哈哈係喎，點解我咁都諗唔到嘅？」

準確一點來說，我們是去大澳。大澳是個水鄉，有「東方威尼斯」的美譽；而我選擇來大澳的原因，就是因為我很喜歡這裏的漁村風味。這裏的生活平淡但簡單，能使我的神經鬆弛下來。每一次入來大澳，總能夠讓我尋找到寫作靈感。

「呢個地方好舒服。」詠琳倚著欄桿說。





我們在大澳散着步，沿途也有很多小食。貪吃的詠琳甚麼也想吃。

「我想食呢個大魚蛋呀！」

「燒魷魚好似好香咁！」

「有班蘭味雞蛋仔，我從來都未見過，買啦買啦！」

我真想問她為什麼這麼貪吃也不肥。

時間已經接近六時，雖然這裏沒有斷腸人，但夕陽已西下，像極一個鹹蛋黃。

「好少可有機會睇到日落呀！」

「我都好少睇。」





這一刻，一切都很美。