《你信唔信，真係有前世今生》: 3.8

「你地有冇興趣去上環行下？」May有一天在WhatsApp group提起。

我和Suki也很空閒，於是，我們三人約了一同去上環。

我站在地鐵站，等待Suki和May的出現。

「點解要約呢度？」我一見面就忍不住問。

May向Suki打了眼色，Suki也向May打眼色，想對方開口，互相推搪。





「喂，唔係你提議咩？」May最後忍不住問Suki。

「係......聽講呢頭可以拜下月老，好似好靈；同埋好似話上面有個大叔解籤都好準。」

「我都聽講過，有個朋友拜完第二日就出左pool喇。」

「唉，你地兩個呢。」我一臉無奈，一邊搖著頭。

「喂，啊Joyce你起交友App有咩進展？」May翹著我的手臂，靠緊我的身軀。





「約左一個男仔食左兩次飯，之後冇下文喇。」我說。

「係咪你太頹？」Suki直接說道。

「不過交友App啲人係咁，可能佢已經搵到女朋友呢。」May說。

「係囉，正所謂，你揀人，人地都揀緊其他人，個森林咁大。」Suki用手臂誇張的比劃著。

「都係，所以我都覺得冇乜野。」我豁達的說。





「好多人用交友App都係求開心姐，鍾意咪覆下，唔鍾意咪完左佢。」May說。

「當然搵到啱嘅就更好啦，個個都話想搵一齊del App嘅人，其實邊有咁易啊。」Suki說。

「係呢， Suki，點解你咁想去求姻緣？」我問。

「冇咩，試下求下啫。」

今天Suki確實有點古怪，一路走著，間中就拿出手機拍照片，然後在打字，就像跟人匯報行程一樣。
「你係咪有啲野瞞住我地？覆緊邊個啊。」May也察覺到。

「冇啦，咪又係交友App啲仔，得閒咪覆下囉。」她刻意假裝冷淡。

「唔係咁簡單啵，要覆得咁密嘅咩？」May搭著她的肩，試圖窺看她的手機屏幕。





「你係咪已經有對象？」我問，然後搭著她另一邊肩。

「嗱，一場姊妹你要對我地坦白啊。」May接著說。

「唉，好啦好啦，係有個我幾有興趣嘅。」她選擇向我們坦白。

「佢點樣嫁？」我問。

「係囉、係囉，有冇圖啊？」May也急不及待。

「開比你地睇啦。」Suki把手機解鎖，然後打開照片：一個身材微胖的年輕男子，樣子很普通。不像平常Suki喜歡在ig追蹤的陽光男孩。

「哇，成個毒男咁嘅樣，乜原來你食得咁偏。」May說。

「喂啊，咩毒男啊，唔係咁囉，張相影得差咋。」Suki嘟起嘴巴反駁。





然後，她接著說：「佢個人都幾好，會送人翻屋企，睇戲會專登帶外套......」

她的臉從生氣，慢慢嘴角向左右兩邊拉開，轉為幸福的樣子。

「點啊，咁好，要表白未啊？」May打斷她的話。

「喂啊，出左幾次街咋，邊有咁快啊。」Suki說。

「你係冇興趣嘅，就唔會今日叫我地黎求姻緣啦。」我說。

「咁未有姻緣咪黎求姻緣囉，況且你地咁啱得閒。」她連忙掩飾。

「仲有啊，啊Joyce都未搵到對象，咁我作為好姐妹都要幫下手啦。」Suki把焦點轉向我。





「係你自己想求咋，唔好擺我上檯啊。」

「你自己唔想要姻緣咩？」Suki反問。

「哼，我就唔信呢啲野嘅。」我翹起雙手在胸前說。

「咁上到去唔好求囉。」

「咁又唔得，一場黎到，冇理由空手而回嘅。」我說。
這時候我們剛剛好走到廟宇，那是一個傳統廟宇的格局，廟的兩旁左右各有攤檔，左邊坐著一個中年叔叔。

右邊有一個Polo shirt加牛仔褲的男子背向我們，然後走進了旁邊的小巷。

那個人的身影好像一個人，那個約會了兩次的Jerry。





Jerry是金融才俊吧，該不會在這個地方出現。就算他是來求姻緣，那也不是他平常的衣著打扮。

可能是我認錯人？

於是，我跟著Suki和May走進廟宇。

Suki跪下，我都跟住跪下來，拿著籤筒在神明面前問卜。

「嗱，你地要記住，要心無雜念咁諗住你想求嘅野，要專心先會靈。」Suki指點著我們。

我心裡想著：「愛情，希望神明比啲指引我。」

我搖著籤筒。

「仆」一聲，一支籤掉在地上，我把數字記住。

眼見Suki和May還在誠心求籤，我靜靜的走出廟堂。

剛才那個熟悉的背影，在門前掠過，我急步走上前。

「先生，唔好意思。我係咪識得你？」

男子轉過頭來。

「原來真係你啊，Jerry。」

「你係Joyce？」

「唔唔。」我點頭。

沒有想過自從那次約會後再也沒有聯絡，再見會是在這裡。

「估唔到你仲認得我，你今日上黎求籤？」Jerry微笑道。

「我陪朋友上黎。」

「哦。」

「你地都係上黎求籤？」

我輕輕點頭示意，然後不自覺地上下大量他一身違和的裝扮。

「你呢？」我問。

「呢度就係我嘅家族生意，打理廟宇係我嘅正職。」

我頓時充滿疑惑。

「欸......正確黎講係叫廟祝。廟宇個廟，祝福個祝。」

「我完全冇諗過你係做呢行。」我幡然大悟。這是我第一次聽到這個職業。

「我都知香港少人做呢行，講出黎都未必有人識。竟然起呢度有緣撞翻你。」

「係囉，真係有緣。」

「你啲朋友好似搵緊你。」他指一指廟堂的門口。

此時，我看見May，和Suki踏出廟堂，左顧右盼的，似乎在找尋我的身影。
我向她們招手示意，她們向我走過來。

「同你地介紹，呢個我朋友Jerry。」

「啊May， Suki。」我向Jerry介紹朋友。

「你好。」

「我都係咁啱頭先出黎撞到佢，佢係起呢度做野。」

「你地係咪求左籤，你地過去搵我啊叔解籤啦。或者信得過我，我都可以幫你解。」Jerry說。

「欸......」May和Suki對望了一下，她們尷尬的眼色不言而喻。

「哈哈，我都知我咁後生好難說服你地信我，你地過去搵啊叔啦。」Jerry一下子就看穿她們的心意。

「咁我地過去搵阿叔。」May說完，然後拖著Suki走。

剩下我和Jerry兩個人在原地。

「唔......我想你幫我解。」我不自覺的低下頭。

「你想求咩？」他問。

「愛情......」我有點尷尬的說道。

「咁就啱啦，我地呢度最出名係求愛情。」Jerry自豪的說，然後請我坐下。

「你支籤係話有啲野其實一直起你身邊。你有好多野唔確定，所以唔敢自己主動踏前一步。慢慢又開始覺得，維持現狀都係一個唔錯嘅選擇，但係內心始終都仲係有一絲希望。宜家嘅你都好迷惘應該要點做。」

「係，我宜家都好迷惘。咁神明有啲咩指引，可唔可以指點下迷津？」

「唔......其實可以試下，反正你都起呢種狀態咁耐。」

「哦。」我細意思考著。

Jerry準備離開，而他從一相遇就沒有提過他不再聯絡我的原因。
「我可唔可以問你一個直接嘅問題。」我還是按捺不住。

他點頭。

「你......最近起交友App有冇搵到對象？」

「冇啊，你呢？」

「我都未。」

「咁點解你冇再約我？」我直接問，雖然知道這個問題有點尷尬。

「你真係想知道個真相？」

「你講啦。」

「你記唔記得，嗰日你問我射手座嘅人係點？」

「係啊。」

「嗰一刻，我知道嗰個鍾意左射手座嘅唔係你朋友，而係你自己。」

「欸.......其實......」我想過否定他的推測，但我不想欺騙他。

「我鍾意Ken？我唔知道。」我心裡忽而冒起這個疑問。

「無論點都好啦，我好高興認識到你，希望你搵到你嘅幸福。」

「我去做野先喇，Byebye。」Jerry輕輕拍了我的肩膀，然後轉身而去，他踏著輕快的腳步。

我呆站在廟前。看著漸漸細小的身影，踏進廟宇。

風輕輕吹著，廟內籠罩著灰煙。

他的背影被煙包圍，最後消失在灰煙當中，只見廟內灰煙依舊。

我轉身，只見旁邊香爐的線香也剛巧燒盡，剩下零星的灰燼徐徐散落。