［科幻有甜］《一場末日危機，令患上中二病的我變成救世者》18+: 第二十七章：十面埋伏

走咗一段路，終於撇甩肥佬，我邊講邊喘氣：「啱先被妳嚇親，原來妳身上帶咗武器，但支槍喺邊度嚟㗎？」
「呢支叫元氣手槍，係用念力操控同發射嘅精神武器，我之前透過外置程式裝咗入你個腦，只要你個腦投射出支槍嘅外型出嚟，佢自然會出現喺你手上。」
果然係咁，當我個腦諗住支槍，支槍就無啦啦咁出現嚮我右手。
「只要你依家對準目標心諗住發射，佢就會發射。」
「原來咁鬼易用，等陣一於靠晒佢。」喺手握元氣手槍嗰一刻，我發現自己變強咗。

我同蘿莉行咗一陣，一路上再冇遇到枉死冤魂，反而係路邊啲行人個個七老八十，佢哋應該係壽終正寢嗰班人。蘿莉講得冇錯，人到咗呢個年紀，好明顯唔會再擁有七情六慾。去到信和附近，我見到離遠有個著住黑色皮褸，戴住黑超嘅年青人，佢見到我哋立即掉頭走，同附近十居八九諗住去輪迴嘅老人家形成強烈對比。
「我懷疑佢係撒旦嘅代理人，目的係想調動人馬滲入同控制數據閘門，最近呢個區域經常出現異常數據。」我聽到馬太嘅語音通訊。
「ROGER。我哋會跟蹤目標。」蘿莉回覆馬太。
我心諗：夜麻麻戴黑超，呢個人相當有可疑，為了解箇中原因，我決定追前調查。點知跟咗佢一陣，條友入咗一條冷巷。


「阿當小心啲，前面可能有埋伏。」原來係夏娃喺我耳仔邊同我講。
「放心，我有元氣手槍。」我好有自信心咁答佢。

我冇等蘿莉，自己一個用快正常人三倍嘅速度衝入條冷巷，點知入到去只係見到一堆二堆垃圾，條友卻消失無蹤。正想走嗰陣，聽到一連串古怪嘅聲音：嘞....嘞....嘞....嘞........就好似啲骨頭嚮度互相磨擦同碰撞傳出嚟咁。我立即望向冷巷盡頭，眼前景象令我冷汗直標！原來冷巷前後竟然被一大班惡鬼包圍，仲要個個喪屍同吸血鬼咁嘅死樣，當中有個男嘅爛面，另一個女嘅手腳竟然有正常人三倍咁長，今次真係中晒伏！

正當我企嚮度呆咗嗰陣，啱先隱咗形嗰個皮褸怪客失驚無神喺班惡鬼後面出現，跟住除低副黑超，露出本來面目嘅佢，竟然係洛不凡！
「SURPRISE…….有冇聽過好奇害死貓？今次係你條仆街仔自己攞嚟，你要死唔好怪我！」洛不凡好得戚咁講。
就喺呢個時候，一個人突然喺我身邊從天而降仲跟手爆埋地，原來係蘿莉！