「我哋其實都冇正式交往過,佢只係我中學時期嘅同學嚟。」我一臉尷尬咁講。
「你自己要小心啲。佢認得你,即係代表佢嘅智商接近潛伏者,通常呢類擁有天賦嘅人,本身都會具有成為潛伏者嘅特殊能力,問題係佢企喺邊面,選擇幫你定害你。」夏娃一本正經咁講。
我唔肯定夏娃咁講係出自女人妒忌心定係有其他考慮,但如果佢同我嘅關係變成流於形式上嘅伙伴,加上佢又冇戀愛上嘅需要,我哋只能夠稱得上係工作上嘅拍擋,好難進一步去發展,雖然我覺得某程度上佢仲係愛我嘅。

就喺第二日,我獨自離開老洞出發去搵辛梓玲,蘿莉本來話要跟埋嚟,我同佢講話想試下自己實力,其實係唔想佢阻住我同女神約會。我一早用咗潛伏者嘅借庫大法(其實係駭入國際金融大鱷嘅銀行戶口提款)出咗部新電話,然後用記憶中嘅電話號碼打俾佢。好好彩,喺我冇記錯同對方冇搬過屋嘅情況下終於俾我搵到女神。
「喂,我係子奇。梓玲妳得閒嗎?關於上次件事,我......想見妳。」
「睇唔出你仲係咁宅,今時今日都仲未識得約女仔。」
就係呢兩句開場白,令久別重逢嘅我倆又開始重新出發。我約咗女神去佢幫襯開間餐廳食晚飯,嗰度係一間好地道嘅連鎖餐廳,價錢唔算貴,仲可以俾你坐好耐傾偈嗰隻。喺約定嘅時間,終於俾我見到佢,佢著住套米色露肩衫加埋條紫色短裙褲,青春氣息爆晒燈。
「想食乜?叫得妳出嚟梗係我請。」
「餐牌上有咁多款野,食咩好呢........今日我想食台式。」


結果我點咗三杯雞同麻辣鴨血冬粉,原來呢啲都係辛梓玲曾經喜歡嘅菜式。
「麻辣鴨血令我想起米血糕,上次我哋去墾丁畢業旅行時你喺街邊請我食過,我哋一支兩份食,味道好正又彈牙,我到依家仲記得。」辛梓玲說話時面上浮現出幸福嘅表情。
「冇見妳咁耐妳果然一啲都冇變。依家做緊邊行?」
「我做緊新聞記者,專門負責搜羅一啲稀奇古怪嘅事,另外我仲係個網絡小說作家。其實有樣野我想問你好耐,上次點解你會出現喺嗰度?你知唔知嗰度係咩地方嚟?」講講下,辛梓玲突然改變語氣,變得稍為嚴肅。
「信和?我經常都有去嘅。」為咗淡化緊張心情,我飲咗一啖汽水後再講。
「嗰度係來自陰間嘅信和,係死人先會出現嘅地方。我上次喺屋企靈魂出竅時蕩失路,唔經唔覺行咗去嗰頭,我見你同個冇著衫嘅女仔一齊追緊人,本來想避開,點知嚟唔切就俾嗰個人捉住。我估你唔會又係靈魂出竅咁橋嘛?」
「妳聽我講,個女仔其實係.........」我不斷撓頭,諗唔到點向辛梓玲解釋蘿莉呢個人係點嚟。
「我之前見過好多,通常死於姦殺嘅女仔出現嗰陣都係全身赤裸。」
「係啦,差唔多係咁........我同妳講我曾經死過,仲加入咗秘密組織,妳信唔信?」
「我信,因為我親眼見過好多比起你嘅遭遇更加不可異議嘅事。」
已有 0 人追稿