杜曉彤跟母親的約定地點為行人天橋底一個偏僻的位置，母女二人原本決定一起到辛梓玲家暫住，可惜過了約定時間良久，仍未見其蹤影，杜曉彤一時間心急如焚。
「點呀？搵唔搵到妳媽咪？」辛梓玲向不斷致電母親尋找其下落的杜曉彤問道。
「打極都仲係電話未能接通呀！佢好少會遲到，會唔會有意外？」
「咪亂諗，我相信妳媽咪冇事。」
就在此際，洛不凡帶同杜媽媽一起在街角出現，並且一同衝上前欲向杜曉彤二人理論。
「妳係邊個？做乜拐帶我個女？」杜媽媽忽然黑面向辛梓玲問話。
「原來就係妳個飛女教唆我妹離家出走。」眼見杜媽媽嚴詞譴責，洛不凡立即附和。
「妳唔好冤枉好人，要怪就怪呢個人身有屎！」辛梓玲將矛頭指向洛不凡。
「妳做咩鬧我個仔？佢係我親生嘅，依度冇妳呢個外人嘅事，走開！」
「妳唔係我媽咪........妳究竟係邊個？」杜曉彤突然意識到母親不對勁的地方。
「睇嚟你個惡靈手下搞唔清楚你同你個妹之間嘅關係，曉彤我哋走！」在關鍵時刻，辛梓玲立即踢爆洛不凡。
「想走？」洛不凡說畢，受惡靈操控的杜媽媽突然發難，企圖以綠色藥水針筒打入杜曉彤體內，幸好二人反應快，及時避過一劫逃走。
「妳兩個死八妹，咪駛旨意走！」洛不凡惱羞成怒地說。
由於辛梓玲二人逃走的速度及不上洛不凡，雙方之間的距離開始收窄。在黑夜的街道中，三人互相追逐，辛梓玲眼看杜曉彤即將被逮住之際，一名女子突然從遠處走出並且踢向洛不凡要害，那人是夏娃！