［科幻有甜］《一場末日危機，令患上中二病的我變成救世者》18+: 第四十四章：天倫劫

熟識急救嘅辛梓玲第一時間衝前檢查我媽情況，然後講咗句令人絕望嘅說話：「你媽鎅頸後失血過多，佢冇晒心跳同呼吸，已經走咗！」
目擊我媽自殺，我無法相信自己眼前所見，腦海變得一片空白，如同被點穴一樣。與此同時，遠方有警車鳴笛聲音傳嚟.........

辛梓玲驚覺一切事態不尋常，佢起勢搖我，叫我抱起曉彤然後跟佢離開。
「我媽咪依家出咗事，我要去救佢！」對於我媽突然自殺，我一時接受唔到，故此立即拒絕。
「你冇身份證，又冇入境紀錄！萬一警察查起上嚟，佢哋會以為你媽嘅命案同你有關而拉你。」

嚮冇選擇之下，我唯有抱起曉彤，然後同辛梓玲一齊走，就喺呢個時候，夏娃個機械信差正太揸咗佢部車出嚟接應，架車一停低，我哋立即跳上車離開現場。喺架車入面，我個腦完全癱瘓諗唔到野，只係不斷LOOP返起以往我同我媽之間嘅生活片段。我媽好地地去咗，我覺得好內疚同自責，如果我唔復活，如果我唔再出現喺佢面前，如果我唔係潛伏者嘅話..........佢可能唔會有咁嘅下場。

渾渾噩噩嘅我唔記得時間過咗幾耐，最後架車停喺辛梓玲屋企樓下，我哋扶咗曉彤入屋。其實我一直心煩緊一旦曉彤醒返之後，我唔知要點樣同佢解釋一切，結果佢醒返之後粒聲唔出，一直呆咗咁坐喺客廳，但佢咁樣反而令我更加冇法原諒自己。


成個氣氛靜侷咗好耐，然後曉彤忽然喊住攬實我，並且向我講咗一句話：「我媽咪係唔會無端端自殺，件事一定同洛不凡有關..........雖然我唔肯定你係咪我大哥，但我已經當咗你係我親人一樣。」
「妳媽咪嘅事我會幫妳，放心。」原來曉彤仍然未認出我，故此我只能夠扮第三者嘅口吻去安慰佢。
「咁你依家打算點做？」辛梓玲突然問我。
「妳幫我喺度睇住曉彤，我去搵其他人幫手！」