［科幻有甜］《一場末日危機，令患上中二病的我變成救世者》18+: 第五十二章：撒旦之子

「我已經將撒旦嘅意識由你女友身上驅逐，可惜佢已經懷孕，經手人係撒旦，為咗你同佢嘅自身安全，個細路要小心保護以防止日後被撒旦埋身奪舍。」勢估唔到彌賽亞講野嘅時候表現虛脫，就好似大病初癒嘅人咁樣。
「對唔住，上一次我媽嘅事我錯怪咗你。」我一臉認真向彌賽亞道歉。
「你返嚟老洞啦，我哋需要你嘅幫忙，而且我懷疑夏娃被撒旦捉咗。」就喺彌賽亞講完呢番話同時，佢同馬太嘅身影竟然逐漸平空消失。

當一切塵埃落定之後，曉彤望住我眼光光咁，好明顯佢對剛才所發生嘅事完全察覺唔到，就好似成件事眨下眼就完結一樣。
「曉彤，應承我唔好同梓玲姐姐提起今日嘅事，我相信佢係有病，但已經好返晒。」
對於我嘅請求，曉彤點頭答應。我第一時間衝前抱起地上嘅辛梓玲上梳化，醒返後佢話自己當時嘅靈魂被趕出身體以外好遠嘅地方，對屋企所發生嘅事完全冇印象。
「我一醒返間屋就咁亂，到底係咪有賊人入過嚟？」辛梓玲一邊講，一邊好攰咁望住我，原來佢唔知自己發生咩事。
「係呀……頭先呢度停電，我哋擔心妳所以衝入屋，黑麻麻之下所以撞冧晒啲野。曉彤，我有野要同梓玲姐姐講，麻煩妳先入返房。」我向曉彤打眼色，因為我唔想佢將入屋之前嘅野同辛梓玲講，怕佢嚇親對方，而且有啲野我唔想俾佢知道。
雖然曉彤唔情願，但佢都選擇暫時避開一下。


「梓玲，妳係咪有咗BB？」
辛梓玲低頭不語，似係默認一切。諗返起成件事，唔通當日同我做嗰個係撒旦上身嘅辛梓玲，目的係借種誕生屬於佢嘅下一代？
「我唔同你講係擔心你會唔理我，尤其係你依家咁難堪嘅身份。」辛梓玲一臉眼淚咁同我講。
「傻豬，我點會唔理妳？我自然有辦法去搵個新嘅身份同妳結婚生仔。今後我只會搵洛不凡幫我媽報仇，至於潛伏者嘅野我係唔會再去理。」
雖然我親口同辛梓玲保證，但一想起彌賽亞嘅說話，唔知點解我就好擔心夏娃嘅安危，成晚瞓覺都夢見同夏娃一齊所發生嘅事。夢境中，我聽到佢同我講嘅每一句心底說話.............
「傻豬，我點會唔理你？日後去到系外行星我仲要同你生仔。話你知，地球人其實係根據我哋潛伏者嘅生物藍圖設計出嚟嘅實驗體，只係我哋嘅基因曾經被優化過，比起你哋有些微優勢，但我鍾意你哋嗰種冇修飾過嘅原始情感........對事物產生好奇心，而且對生命又充滿熱情同關愛。」