［科幻有甜］《一場末日危機，令患上中二病的我變成救世者》18+: 第五十六章：成者為王，敗者為寇

「月闇佢終於醒返啦？既然係咁，就帶佢入嚟！」話畢，陳蓮娜將整杯紅酒一飲而盡。
月闇帶著雙手被手銬鎖上的杜子奇進入會議室。剛步入會議室的杜子奇，與洛不凡對上了眼，向對方吐了一下口水以示憎恨。
「月闇，妳帶嚟嘅人到底係邊個？」陳蓮娜望向杜子奇，內心產生似曾相識的感覺。
「回撒旦大人，佢叫阿當，係同夏娃一齊上過方舟號嘅地球人，自從方舟號爆炸事件之後，夏娃招攬咗佢成為潛伏者其中一員，今晚我跟蹤佢去到老洞嘅時候發現彌賽亞已經奄奄一息，所以索性捉佢返嚟向撒旦大人效忠。」
「維達，月闇講嘅到底係咪真？」
「回撒旦大人，呢件事千真萬確，當彌賽亞用時空夾縫狙殺權仗男同日光嘅時候，我因為藏身喺其它地方而避過一劫，後尾到我出現嘅時候，彌賽亞已經氣絕身亡，呢個靚仔當場被我同尾隨而嚟嘅月闇捉住。」頭戴軍帽，身穿軍服的維達向陳蓮娜說。

月闇按著杜子奇背部，並將他帶至陳蓮娜面前，陳蓮娜看著杜子奇那五官突出的面孔，馬上便記起她透過辛梓玲身體跟對方在梳化上做愛的片段。
「靚仔，你有幸被我欣賞過你嘅床上功夫，如果你肯效忠我嘅話，我可以免你一死，仲可以保證你一生富貴榮華。你會點樣揀？答我。」陳蓮娜走近問杜子奇。
「立即回答撒旦大人嘅說話！」月闇說話期間出力抓緊杜子奇的頭髮，藉此威逼對方就範。令在場眾人感到奇怪的是，杜子奇只笑不語。


「我份人冇咩耐性，如果你再唔出聲嘅話，我就當你拒絕我！話你知，你嘅下場絕對會係咁多個潛伏者當中死得最慘嘅一個........」話畢，陳蓮娜拿出大麻煙並且燃點起來準備吸食。
「哈哈.......哈哈.......」就在此刻，杜子奇的笑聲令眾人的目光集中在他身上。
「你到底笑咩？」陳蓮娜表情詭異地問道。
整個僵局只簡單地維持了數秒，直至杜子奇留意到陳蓮娜說話完結時一張嘴還沒合攏。
「哈哈，我笑妳已經中計！」