結果老洞由杜子奇策劃及領導之下，慢慢從破損的廢墟中重新建立起來，一班機械信差經過升級維修後，實力亦得以提升。由於杜子奇經常奔波遊走於老洞與辛梓玲兩者之間，繁瑣的工作令他變得分身不暇，加上急需處理的人際關係，兩邊兼顧的他逐漸形成精神透支的狀態。
這晚，杜子奇回到跟辛梓玲一起的愛巢。
「媽咪話佢次次陪我去睇醫生檢查個肚都唔見你，問你係咪做埋啲唔見得光嘅野。」在睡房內，辛梓玲向杜子奇抱怨。
「我之前咪同妳講過搵緊人幫我建立假身份嘅野？我依家搞掂晒，可以上去妳屋企傾結婚嘅事啦。」
「係就快啦，都就嚟見肚啦。」
「咁聽晚我哋一齊約佢哋食飯好冇？」
「你係記住先好。」在床上，辛梓玲擁抱著杜子奇說。
「話時話，依家妳仲有冇夢見上次食大麻個女人？」
「你講起又冇喎.......自從我上次靈魂歸位之後，已經有幾個星期都冇夢見佢，認真希望佢呢一世都唔好再纏住我。」辛梓玲話畢，二人便在床上大戰起來。
另一邊廂，位於老洞內的藏寶室，是一個被菲臘使用作為收藏屬於撒旦破損權仗的秘密地方。然而，對於某個人來說，這是個公開的秘密。這晚，他偷偷將權仗帶走至一個四下無人的戶外僻靜地點，目的是給前來會面的人作為見面禮。
「我哋好耐冇見，猶大。」二人的對話在天橋底下的暗角展開。
「我要嘅野呢？」
「支權仗喺度。」說話的人竟是彼得。
「好在有你幫忙。自從維達呢個叛徒將撒旦大人同日光佢哋嘅生物數據清除之後，我同洛不凡只能夠暫時避開風頭，全靠你幫我哋攞返支權仗，等我將佢修理好之後，收藏嚮裡頭屬於撒旦大人嘅靈魂就會復活。」猶大接過破損權仗後，雙眼顯得烱烱有神。「其實........你一向對住彌賽亞忠誠，點解你會幫我哋做咁多野？」
「今時今日，忠誠係唔可以當飯食㗎啦。本來我大有機會接任彌賽亞嘅位置，依家居然被個靚仔坐咗上去，既然佢咁想死，咁我就索性嚮背後推佢一下啦，正所謂敵人嘅敵人就係朋友嘛......」
「合作愉快。仲有，我想問下你有關約翰同馬太佢兩個嘅數據備份.......」
「放心，所有對我哋有害嘅數據已經被我喺網絡入面清除晒。最可惜係上次唔可以借夏娃件事整死個靚仔，算佢命大.......」