當我聽到彼得同蘿莉之間嘅對話嗰陣,我根本無法相信自己對耳朵。我睇住蘿莉有所行動,下一秒內心立即盤算自己嘅對策:冇錯,用時空夾縫的確係可以消滅蘿莉,但咁做等於直接殺死佢。論速度,我根本唔夠佢快。要逃走,面前係一個大海,我冇能力辦到。就喺我諗到一半嘅時候.........嘩!我下身突然被一隻腳踢中,成個人就咁彈起。我好痛咁喺沙灘爬起身,原來剛才下體被蘿莉狠狠踢咗一腳!點知就喺我錯愕之間,腹部又被蘿莉打多一拳!
「叛徒!你殺死我哋咁多同伴,我今日要你死!話你知,彼得已經刪除咗你嘅數據備份,你死咗之後係唔會再復活㗎啦!」

睇嚟彼得已經控制晒老洞入面一切人物,蘿莉今次咁重手,佢要殺我係真嘅........當下我嘅處境非常危險,身體所受嘅傷好嚴重,口角不斷吐血,爬嚮地上已經冇辦法還手...........只有眼白白等死.........
「彌賽亞,雖然我恨你,但為咗尊重你,我會用我嘅絕技送你上路!」蘿莉講完立即爆甲,喺月色映照之下,露出白雪般全裸嘅波地,隨住乳房一下子向外膨脹,胸前兩粒蓮子逐漸變成深紅色,原來佢想用心口死光殺我........估唔到我多次大難不死,如今竟然會死喺一個裸體女機械人手上。

黑夜中,海上傳來陣陣浪濤拍岸聲震撼我耳朵。臨死前一刻,我望住蘿莉,雖然知道一切即將完結,但總感覺時間過得好慢。然而,就喺心口死光發射嗰一刻,一個黑影突然從遠處飛撲埋嚟,瞬間以腳踢中蘿莉肩膊,令死光偏離發射方向,射中我身旁嘅礁石!由於形勢突變,我隨即望向來者方向,只見有人飛身擊中蘿莉之後,安然著地,對方原來係上戶彩!
「彌賽亞,你冇事嘛?快啲跟我一齊走!」身穿黑色彈性緊身衣嘅上戶彩擋嚮我同蘿莉中間,略微側頭向我喊話。
「睇嚟狐狸終於要露出尾巴啦!」身處蘿莉背後嘅彼得見狀立即回應,更欲向上戶彩使出太古之魂。
「彼得停手!呢個距離出招嘅話,你會傷到蘿莉!」菲臘立即制止對方出手。


上戶彩反應奇快,佢立刻向地面擲出數枚閃光彈,所產生嘅強光令一眾人頭暈目眩。
「上車!」就喺呢一刻,上戶彩指向海邊一架水上電單車,就係呢架車令我明白到點解佢會神出鬼沒咁出現。
幾乎同一時間,對方扶我上車,然後踩盡油門,令水上電單車高速駛離現場,留低背後一度飄揚嘅浪花。
已有 0 人追稿