我一向都以為自己卸下彌賽亞嘅身份之後，就可以過返啲安樂日子，點知現實係殘酷嘅，俗語話：天要下雨，娘要嫁人，要嚟嘅始終都要嚟，為咗個妹，我要作戰到底。
「你依家嘅情況係敵暗我明，內裡一定有圈套，不如我哋同你一齊上去好冇？」知道我諗緊乜嘅夏娃走過嚟以關懷嘅眼神同我講。
「唔可以。對方脅持住曉彤做人質，如果我貿然帶一班人上去嘅話，佢會有生命危險。」
「或者我可以幫到你。」就喺我同夏娃對話之際，突然有人插嘴，說話嘅人原來係約翰。
結果，我喺當晚上咗辛梓玲所住嘅大廈。當我嚟到約定嘅地點，亦即係大廈天台頂，剛踏入天台嘅同時，隨即聽到曉彤大叫：「哥，救我！」
曉彤被人五花大綁，然後再被一條粗麻繩離地吊起，整個人置身大廈天台範圍以外，身體懸掛半空，腳下四十層樓係地面，僅靠外牆吊架支撐體重。同一時間，上次出現嚮西貢，身穿黑色教士袍同配戴倒十字架嘅男人則企喺個吊架隔離，手上仲拎住個裝置，上面有一粒紅色掣。
「彌賽亞，我哋又見面啦，不過今次係最後一次！」被撒旦上身嘅辛梓玲離遠向我喊話，佢身上披上一件黑色斗篷，內裡真空，右手拎住支權杖，以魔鬼嘅姿態企喺大廈另一邊嘅天台邊緣，附近仲有洛不凡為佢把風。
「廢話少講！妳到底想點？」
「好簡單，只要你喺度跳落街，我哋就放你個妹走！」辛梓玲立即回應，佢企緊嘅位置位於曉彤對面，雙方相隔整個天台嘅距離，佈局好明顯經過精密計算。由於時空夾縫嘅缺點係使用時間短，加上大量虛耗精力唔可以連續用，換句話講，即使我用時空夾縫去拯救阿妹，事後我未必可以應付撒旦嘅後續攻擊。
「妳當我傻！我跳落去仲點知妳會唔會放人？」我亂答一通，目的只係為爭取時間思考點去救人。
「你同我聽住，我依家倒數五下，數完之後你仲唔跳嘅話，企喺天台對面嘅猶大就會撳個紅色掣去切斷條繩，你個妹就會跌落四十樓慘死！」