為咗拯救曉彤，我利用時空夾縫借返嚟嘅短暫光陰用晒喺救人方面。我見到條大麻繩吊住被人五花大綁嘅曉彤，但只能夠以一己之力扯佢返落嚟，而且對方喺時空夾縫完結前更毫無反應，就好似搬動一具傢俬咁叫人無從入手。終於我費盡九牛二虎之力，將好似公仔一樣嘅曉彤成功安置喺天台地板，剛巧時空夾縫就此完結，我定眼望住阿妹個樣，因為我唔太肯定自己喺移動對方時有冇整傷佢。
「曉彤！妳醒下！」我邊講邊拍曉彤塊面。
「係你？你幾時救我落嚟㗎？」當阿妹擘大眼應我嗰陣，我用力攬實佢，就喺呢一刻，我聽到遠處傳嚟一下非常熟悉嘅慘叫聲：「救命！」
我望住前面，見到洛不凡喺身邊利用權杖變咗一個結界出嚟，就喺佢進入結界之前，突然發狂掟咗梓玲落街！我大驚，馬上想再次使用時空夾縫，無奈失敗，隨即撲向天台邊緣，結果喺梓玲硬著陸前最後半秒再一次將時空夾縫成功啟動。我喺天台高處見到梓玲墜地前一刻嗰個細小嘅身影，完全無法接受眼前嘅一切係事實。望住將要失去寶貴生命嘅未婚妻，眼前影像歷歷在目，直至被凍結嘅時間耗盡，最後對方墜地身亡為止。
嗰一刻我先明白，時空夾縫唔係萬能，面對至愛死亡，即使身為彌賽亞亦唔可以力挽狂瀾，一種慘絕人寰嘅感覺喺我內心不斷徘徊，嗰種心情甚至無法用筆墨去形容，下一秒，我眼前一黑。