［科幻有甜］《一場末日危機，令患上中二病的我變成救世者》18+: 第八十一章：末日來臨(上)

菲臘利用佢最擅長嘅追蹤術得悉洛不凡最後藏身嘅地方。嚟到呢一刻，我終於可以為梓玲同阿媽，以及所有被撒旦迫害嘅人討回公道。喺夏娃嘅結界引領之下，我哋一班潛伏者終於跟洛不凡喺位於南非一個地下礦井底部面對面交鋒，各人出絕招一齊同佢打咗十幾個回合。
「投降啦，撒旦，你已經無路可逃啦！」呢句係我唯一對洛不凡嘅忠告。
「哈哈......一班患上自大症嘅潛伏者，你哋.....知唔知......點解我要山長水遠咁引你哋嚟呢度？」手持權杖嘅洛不凡說話時面容憔悴，咀角流血，睇嚟身體已經受到好大程度嘅傷害。
「死心啦，今日我哋係專程嚟收拾你嘅！」我講完之後，身體隨即進入時空夾縫模式，然後我利用手上嘅元氣手槍，直接射擊撒旦嘅真身，亦即係洛不凡手執嗰支權杖，直至權杖完全粉碎為止。

點知當時空夾縫完結之後，出現喺洛不凡面上嘅竟然係一沬邪惡嘅笑容。
「哈哈......彌賽亞.......你終於.......親手.......毀滅地球啦。」洛不凡居然一邊講一邊咀角流血，畫面令人不寒而慄。
「你到底想講乜野？」我反問對方。
「支權仗......除咗係我意識嘅容器之外，我亦已經將佢.......改造成一個地球終結啟動器，你.......剛剛啟動咗一個埋藏於地底深處嘅反物質炸彈。」
「我係唔會被你大倒我嘅，我依家就要將你送去一個令你接受人類制裁嘅地方！」


「我引你哋嚟之前.......已經吞咗毒藥，我冇打算繼續生存，我只係想.........攬住你哋一齊死！哈哈！係喎，你係神，咁你知唔知幾時係世界末日？」洛不凡面上擺出一副魔鬼般嘅表情，精神出現歇斯底里狀態嘅佢向現場所有人咧嘴而笑，就好似宣佈自己獲勝一樣。