《我的MK妹同桌》第二季: 15

「唔準偷望啊你哋！」呀詩佢叫我哋唔好係後面偷望，「我一陣都唔會望返你哋！咁樣先有神秘感啊嘛。」
 
「好啊。」子晴出嚟附和。
 
寫好之後，我哋每人捉好自己嗰一角，行去同老細講，老細幫我set好曬嘢之後，其實就差唔多，準備影相，就鬆手。
 
天燈緩緩升到上空，我望住我寫嗰一句，特別特別想實現嘅願望⋯⋯
 
希望呢一次可以同呀詩行落去
 


喺嗰盞天燈升上去嘅瞬間，呀詩正正企係我對面，望完嗰句之後，就能夠清晰咁見到呀詩嘅臉龐。
 
佢好滿足咁對住我笑，側側地個頭，飄逸嘅頭髮不經意咁散落嚟，好唯美。
 
除咗呢句之外，都有寫啲來年嘅目標，雖然唔係啲咩好遠大嘅理想，但至少俾自己進步先。
 
唔想俾自己再好似以前咁，想趁仲後生嘅時候，多做一啲事，老咗先唔會無回憶。
 
嗰一日嘅相已經變成我ig其中嘅一個post，係我第一個ig post，至今為止，我都無刪到。
 


就算日後出咗可以典藏嘅功能，都一直存在。
 
呢個旅程好快就過，細細個唔明點解開心嘅時間會過得咁快，大個咗，係唔止開心嘅時間，係所有嘅時間都過得好快。
 
諷刺嘅係，所有我寫係天燈上面嘅嘢⋯⋯
 
我都做到曬。
 
唯獨嗰一句，做唔到。