「點啊?醒啦?」我柔聲問。
 
「嗯——」一個長長伸懶腰嘅聲。
 
「我仲想瞓多陣。」呀詩撲過嚟,攬住我,好似隻貓仔咁,成個樣好滿足。
 
好多時候,都係見到呀詩滿足,我就滿足。
 
攤下攤下,就肚餓,但都無動力想去買嘢食,我咁早起身,早餐都無食,但呀詩就瞓到隻豬咁⋯⋯
 




去到差唔多一、兩點,有人敲我哋房門,我要慢慢咁抽出我隻手,唔好嘈到佢。
 
但原來係我諗多咗,係點都唔會嘈得醒佢。
 
係蕃薯仔。
 
「做咩啊?」我壓低聲音。
 
「買啲嘢食啊,好肚餓啊。」佢睇落真係好似無乜力咁,唔好話佢,我自己都肚餓。
 




「晴晴呢?」依家我哋都叫佢做晴晴了,親暱咗好多。
 
「佢瞓死咗,呀詩呢?」
 
「同佢一樣。」
 
最後我哋兩個走落去買嘢食,係街度周圍行,但搵唔到有咩啱食,好似已經過咗嗰種新鮮感。
 
決定食多次滷肉飯。
 




「你同晴晴點啊?有無咩進展啊今次旅行?」喺等拎外賣嗰陣,我問蕃薯仔。
 
兩個男人傾偈,唔需要隱瞞、造作啲咩,問嘢都唔需要顧慮咁多。
 
「可以有咩進展啊?」蕃薯仔真係好純,呢樣嘢係幾難得。
 
「一對情侶一齊出嚟旅行,會發生一啲嘢,都好正常啊,我哋都大個啦,對呢啲嘢唔洗咁介意。」
 
「我同佢又無喎⋯⋯」
 
「你唔想咩?」我追問。
 
我唔係話兩個人一齊一定要有啲咩,但呢一樣嘢長期忽略嘅話,都會影響到兩個人嘅關係。
 
「我⋯⋯想嘅。」蕃薯仔終於講出真心話。
已有 0 人追稿