《我的MK妹同桌》第二季: 26

期待已久嘅grad din好快就落幕，但其實大家唔想咁快完，意猶未盡。
 
成班人企曬係酒店大門，有安排嘅人已經走咗，只不過大家再影下相，睇下去邊度，就留耐啲咁。
 
「點解仲唔走嘅？」又係我哋四個，基本上佢哋四個陪咗我成個中學生涯，有無其他人對我嚟講無乜大太轉變。
 
要點樣分別嗰個人對你重唔重要⋯⋯
 
係睇如果嗰個人消失咗，對你影響大唔大，會唔會因為咁樣唔開心，對你生活有無咩影響。
 


所以我哋四個好似俾全部人排斥咁，企係一邊，但其實只不過係我哋排走曬其他人。
 
「聽講佢哋話去唱通宵K喎，已經唔止一班話要唱K啦，可能除咗唱K，都無乜其他嘢好做？」子晴回話。
 
「咁唔想咁快完啊嘛⋯⋯」蕃薯仔望一望手錶，「依家先10點幾咋喎。」
 
「咁我哋點好？又唱K？」呀詩迷茫咁望住我哋。
 
「我OK啊，反正我都唔想咁快完。」我答，我自己都唔知仲有咩地方好去，話夜唔夜，話早唔早咁。
 


我哋靜咗一陣，係度睇緊手機，各自搵下有咩做，同埋睇下K房。
 
之後呀Ken走過嚟，開口問道：「喂～你哋一齊唔一齊去唱K啊？」今日嘅呀Ken，都幾型棍，著住件深藍色嘅西裝嬲，gel咗個飛機頭，時髦得嚟又唔過火。
 
「er.....」大家你眼望我眼。
 
「好啊！」最後子晴有禮咁應承。