《我的MK妹同桌》第二季: 65

佢哋其中一個已經出咗局，就算再不忿，都出唔到手，乖乖地退出場外。
 
睇落好似2對1，其實係隻抽嚟。
 
個男仔護住後面，我都一樣，大家係度試探試咁揮幾下手，連牌都摸唔到。
 
移下移下，個男仔突然衝去我背後，我下意識咁樣往後縮，但個男仔嘅目標唔係我，而係我背後嘅Gigi！！！！
 
「喂！！！」我驚呼。
 


「走啊！！」我叫Gigi快啲避開。
 
「哇！」佢淨係識叫⋯⋯然後縮埋一舊。
 
個男仔都好敏捷，出手勁快，Gigi呢種弱質女流又點樣避得切，佢起身想跑過嚟我度嗰陣，已經太遲了。
 
佢起身跑嗰下仲要左腳撓右腳咁，向前仆。
 
我都仲嚟得切去扶住Gigi，佢成個人捱落嚟我度，感覺佢成個人都好輕，真係大風少少都可以吹走佢。
 


「啊⋯⋯」Gigi跌落嚟我度嗰陣輕輕叫咗一下。
 
不過個男仔手上已經攞住咗Gigi嘅名牌，陰陰嘴係度笑，彷彿係度講：「禮尚往來姐。」
 
我叫Gigi行埋一邊先，得返我同個男仔，我都唔知點做，係Gigi面前我又唔想走佬⋯⋯
 
已經保護唔到佢，仲要自己走佬，雖則係遊戲姐，但我身為男人嘅史命感同尊嚴唔容許我咁樣做。
 
所以我最後都係輸咗，輸係反應唔切嘅瞬間。
 


「頭先Sorry啊⋯⋯」我行埋去同Gigi講。
 
佢搖搖頭，講：「唔緊要啦，我知玩呢啲game，我都係累人嗰個嚟，所以我其實嚟Ocamp都猶豫咗好耐。」
 
依家俾人out咗出局嘅我哋，無乜嘢做，就係度吹幾句水。
 
「但覺得中學無乜點參加過活動，好似無乜回憶咁，唔想之後都係咁，就膽粗粗嚟Ocamp，點知都係咁⋯⋯」佢好似好失落咁。
 
我同Gigi隔開一段距離。
 
「其實唔洗諗得咁嚴肅姐，玩個game姐，輕鬆下啦，做咩要驚自己累到人姐？」我笑說。
 
「哈哈⋯⋯都係。」Gigi抬一抬頭，諗咗一諗先回我。
 
我諗住去其他地方睇下咩環境，我哋都吹得差唔多，但後來Gigi問我。


 
「你個手繩幾靚喎，女朋友送㗎？」