於是乎我再問佢,就係咁樣問問下就熟。
 
「咁你由細到大咪無乜娛樂?」我想知佢人生有幾時係開心。
 
我自己係同呀詩嗰段日子最開心,經歷太多開心嘅事,點都唔會忘。
 
「我⋯⋯我記得細細個嗰陣唯一最開心嘅就係星期日,去太古吉之島地下嗰度食嘢,係我呀爸得嗰一日先得閒帶我去食下嘢見下我。」
 
我仲好奇緊,佢呀爸咁忙咩?一個禮拜得嗰一日可以陪到佢?
 


「我呀爸呀媽離咗婚,我係跟媽咪,呀爸得嗰一日可以見吓我。」Gigi補充道。
 
一路聽Gigi嘅故事,我一路覺得沉重⋯⋯難怪佢自帶一股鬱悶嘅氣場。
 
佢嘅世界,我無法想像,更加難深同感受。
 
「嗰陣時吉之島仲未改裝,成日食到一半嘅時候,二樓嗰個鐘就會響,好似係到3點就會響,我都唔係記得咁清楚,但特別在佢會有隻公仔係個鐘度彈出嚟,係度郁吓啊,記得好似係隻馬嬲仔嚟。」
 
「望住佢一夠鐘就出嚟,就覺得好開心,有段時間我仲會專登係二樓等佢響。」
 


「嗰個係屬於我同爸爸嘅回憶嚟。」我觸動到佢嘅停止咗好耐嘅回憶盒,開始有啲眼乏淚光。
 
好彩咁啱要轉車,如果唔係我怕佢真係會喊出嚟。
 
「我知你講嗰個鐘係邊度,我細個嗰陣成日扭計要去吉之島嗰邊買玩具,次次見到佢係個鐘度出嚟,我都會望好耐。」我都不禁懷念吓以前,但明顯地,我同Gigi嘅童年,係截然不同。
 
「我每次都扭爸爸計話要買玩具,佢都會話佢無錢買,淨係夠錢買個扭蛋俾我。」講到呢度,我哋轉線去港島綫度等車,呢一刻,我見到Gigi成日抑鬱嘅臉容上,綻放出一個溫暖嘅笑容。
 
我哋由東涌線轉返去港島線要經過兩條好撚柒長嘅平地扶手電梯,我哋見多人,就好有共識咁行中間條路。
 


「所以我屋企都儲咗好多扭蛋,後尾每次見爸爸,佢都會買個扭蛋俾我。」
 
我同Gigi傾得正起,係我前面迎面而來一個熟悉嘅身影。
 
佢頭耷耷咁,飛快咁係我身邊經過,係察身而過嘅一刻,我認出佢。
 
佢同我相隔有段距離,唔係好近。
 
「呀詩!!喂⋯⋯!!」我叫住佢。
 
佢聽唔到,繼續走。
 
「你⋯⋯等我一陣,好快。」講完,我就留低一頭霧水嘅Gigi,返轉頭叫住條傻女。
 
我個腦好快咁組織起成件事,睇嚟呀詩係想我出camp嗰陣接我,俾個驚喜我,點鬼知遲曬到。


 
我行埋去,發覺條友戴緊耳機聽歌,所以聽唔到我叫佢好正常啊。
 
我拍拍佢膊頭,轉頭望望我,然後露出咗呆住咗嘅表情。