《我的MK妹同桌》第二季: 98

每一啖酒灌落喉嚨嗰一吓都好難吞落去⋯⋯
 
我開始feel到wing wing地，腳步浮吓浮吓咁，我仲知道發生緊咩事嘅，我聽得清呀詩講緊咩，但有啲暈。
 
「佢唔係好掂啦，我同佢去嗰邊休息吓先。」呀詩講完呢句之後，就帶我去個角落頭度抖。
 
印象中班人無因為我哋離開而有咩變動，照樣玩得好開心，只係將個目標換做第二個。
 
我哋搵咗個沙發位，我就咁攤係呀詩膝頭上面，呢個視覺好有愛，佢就好似呀媽咁望住我，為咗唔將啲頭髮整到我，用佢綁係手上嘅髮帶紥起佢。
 




佢紥馬尾個樣好動人，咬住個髮帶，隱隱約約咁露出雪白嘅鎖骨位，我想望吓佢嘅後頸位。
 
呀詩綁完之後，柔情似水咁望住我，然後責備我：「都叫你唔好飲咁多㗎啦！」
 
「我⋯⋯我⋯有啲想嘔。」其實我係扮吓嘢，想嚇吓佢。
 
「吓？唔係啊？你⋯⋯你⋯嘔落嚟啊。」佢拉側邊個垃圾桶過嚟。
 
「我呃你咋，我未去到咁醉。」我偷笑。
 




「屌你咩！」佢推開我，收起剛剛嘅柔情蜜意，我俾佢推到去沙發嘅側邊，女仔粗暴起上嚟，就係咁。
 
「講笑咋，知你緊張我啦，同你玩吓姐，好想好似頭先咁俾你照顧⋯⋯」我借醉撒嬌。
 
「你唔好扮醉啊！而且啊，你頭先係自己攞嚟㗎！無人會照顧你㗎啦！」呀詩抿嘴微笑。
 
我照樣瞓返佢大脾，佢大脾嘅肉軟綿綿，好舒服，呢個位好似有股魔力，好似去變返做細路仔咁。
 
「我係真係暈暈地，但就唔係到醉囉⋯⋯」只要我想，我係可以即刻瞓著。
 




呀詩溫柔咁撫摸我啲頭髮，慢慢咁掃落去，又再拎返起，再掃落去，不停地重複。
 
好似以前媽咪掃我背脊咁，舒服到好快就會瞓著。
 
「邊有人好似你咁，要個女仔照顧返你轉頭，學咩人認叻啊⋯⋯」我眼皮變得好沉重，隱約最後聽到呀詩講咗呢句，但我已經無力反駁。