《我的MK妹同桌》第二季: 102

「唔會㗎啦，依家咁多playboy。」Gigi有意無意咁望一望班上面嘅男仔。
 
我笑一笑，無再多講啲咩，唔係太想同Gigi纏繞係呢個話題度。
 
呢次考試，一堆project，估唔到我一嚟就已經遇到free rider，各種唔同嘅籍口，最後交出嚟嘅嘢，屎到根本上唔到台，大家都中學畢業啦，仲可以交啲好似小學生咁嘅嘢出嚟？俾盡你都係初中級數，仲要係中一嗰隻。
 
好，我都算啦，仲要大大聲講自己去拍拖，唔得閒做功課⋯⋯
 
我夠想拍拖囉，真係燥咗。
 




屌你老母。
 
呢段艱難時期終於捱過咗，仲要再加埋溫書啊，返工，真係體力透支曬。
 
好多個時候，我只係想好好地見下呀詩，係佢個膊頭度瞓一瞓，唔知點解見到佢就有種安心嘅感覺，可以真正令自己緊繃嘅神經，放鬆返落嚟。
 
我成日同自己講，只要捱多陣就得㗎啦，就見到呀詩㗎啦。
 
我哋一早約好咗完咗我嘅考試之後嗰一日就去迪迪尼，嗰日都係呀詩正日嚟，前排算一算，覺得真係啱到爆。
 




呢樣都係令我心情比較愉快嘅一件事。
 
呀詩呢一日去迪迪尼打扮得⋯⋯好可愛。
 
有別於佢平時性感，帶點MK妹嘅打扮，佢之前難得打扮得成熟，今日就已經變得相當可愛。
 
呀詩綁咗一個頭巾，著咗一條連身裙，我都好似見佢著連身裙，呢種咁斯文嘅打扮真係唔配放係一個MK妹身上。
 
但佢依家竟然著得出呢種味道。
 




「生日姐，著到成隻雀咁，做咩啊？你同迪士尼有個約會啊？」我冷嘲。
 
呀詩無出到聲，表情可愛咁睥住我。
 
「生日著得靚唔好咩？得罪你啊？生日係咪大曬啊依家？」佢擰我耳仔，真係用力嗰隻，好痛好痛。」
 
咁樣打情罵俏到欣澳站，睇得出呀詩對今日係期待嘅，如果唔係唔會咁隆重對待啦。
 
只不過我仲拖著疲累嘅心靈，其實肉體無乜身，係有力氣嘅，係心好攰，提唔起勁。
 
最估唔到嘅係，我竟然攰到可以係欣澳轉去迪迪尼嘅車程入面瞓著咗⋯⋯