《我的MK妹同桌》第二季: 112

我哋去到城堡底下，已經人山人海，暮色已投身黑暗，我同呀詩拖住手，趕頭趕命話想見到煙花一開波嗰一剎那，點綴夜空嗰一刻。
 
「好彩趕得切。」我哋趕路嗰陣，係笑住咁趕。
 
我哋求其搵個位攝入去，已經差唔多企係美國小鎮大街嗰度，其他人都等緊煙花，我同呀詩本來由拖住手，慢慢變做輕輕攬住佢條腰。
 
係呢個等待嘅過程，我哋心照不宣，估唔到我會有種起曬雞皮嘅甜蜜感。
 
煙花係城堡嗰度發射，我覺得係仲未點亮成個夜空嗰陣，係最靚，最令人期待。
 




「哇⋯⋯」周邊嘅人發出呢啲聲響，我隱約聽一呀詩都有係度哇。
 
「好靚啊。」我終於聽清楚。
 
「係啊，你要記住第一次嚟迪士尼係同我，仲要睇咁靚嘅煙花喎。」我講道。
 
「傻仔，有咩可能忘記。」連身為男仔嘅我都覺得好甜蜜，我唔想諗太多以後嘅嘢，只係想好好地享受當下。
 
呀詩本來企係我隔嚟，慢慢欣賞緊煙花嗰陣，就越攬越實。
 




變咗佢企係我前面，我從後攬住佢。
 
呀詩講完嗰句無幾耐，忽然轉個身嚟，傾前咁錫我，佢成個重心捱埋嚟，搞到我後退咗幾步。
 
我睇唔清佢嘅表情，此時此刻，我感覺到呀詩對我⋯⋯唔係，係話對呢段感情刻骨銘心。
 
喺煙花底下擁吻，如果有個cam係度，我哋基本上就喺係度拍緊電影咁，想必呢個畫面一定好靚。
 
佢錫咗幾秒，我無合埋眼，我望住眼前嘅煙花，再攬緊呀詩，成個畫面好唯美。
 




呀詩錫完之後，咩都無講，就擰返轉頭，繼續欣賞個煙花。
 
我攬住佢，將自己個頭放係呀詩膊頭度，聞住佢熟悉嘅氣味，每一次聞，都覺得好香。
 
好長一段時間，煙花嘅頻率開始低，有人已經開始散場。
 
要維持一段感情，甜蜜嘅環節真係必不可少。
 
因為咁，我覺得我同呀詩之間，好似無乜點變過咁，仲好似以前咁。
 
但其實唔係，我哋都會長大，只係當初嘅心，仍然猶在。