《我的MK妹同桌》第二季: 127

「下？？？」我大聲到嚇親正準備上糖水嘅女職員，我連忙同佢講Sorry。
 
「搞咩啊？」我好奇一問，而且係極之好奇，佢哋兩個明明好地地㗎喎！而且蕃薯仔呢一年又陪子晴retake咗一年，理應感情更加深厚先係。
 
「你哋唔係好地地㗎咩？蕃薯仔佢好愛你㗎喎。」
 
「我知佢好愛我啊，亦都知佢好就我，但原來咁樣，會加速愛情嘅熄滅。」哇⋯⋯咁抽像嘅？佢中文應該考得幾高分。
 
「唔明。」我直言。
 




「我簡單啲講，姐係越係咁樣遷就，其實會更加快無咗層火花，我哋甚至連交都無嗌過⋯⋯我都唔知我係呢般關係裡面，算唔算係幸福。」
 
「你話佢唔錫我，唔寵我咩？又唔係，理應係好幸福先至係，但我就係無乜邊個moment感受到幸福。」
 
「佢份人比較木訥，唔識啲咩浪漫嘢，亦都好好，但就係⋯⋯就係咁囉。」
 
子晴長長咁嘆咗口氣：「唉⋯⋯」
 
「唔知點講好。」佢無奈。
 




咁樣講完，我又有啲明子晴想表達啲咩，但我實在覺得如果佢哋兩個咁樣分手，好可惜。
 
「蕃薯仔佢本身就係咁，由你識佢嗰刻就知佢係毒撚嚟，當你應承話同佢拍拖嗰陣，佢真係好開心好開心，雖然佢好傻，啊⋯⋯我係指嗰個樣，但係佢為咗想俾最好嘅嘢你，盡曬力。」
 
我諗返起蕃薯仔前排成日話唔得閒，要陪子晴溫書，我有問過佢陪人溫書唔悶㗎咩？
 
「唔悶啊，我哋一路以嚟拍拖都係咁。」呢句說話好touch到我，真心。
 
因為對我嚟講，真係悶到仆街，我會無幾耐就想打機瞓教，但係蕃薯仔唔同，呢個就係佢對拍拖從一而終嘅睇法。一路都係咁，有咩問題啊？
 




蕃薯仔唔想變㗎其實，只係現實都要焗住人變咋嘛。
 
「唉⋯⋯呢啲嘢我都知，所以我先話諗咋嘛，我都成日說服自己咁樣無問題，我同蕃薯仔一齊係開心，我哋去台灣grad trip嗰陣都好開心。」
 
「但係當我問自己係咪真係幸福嘅時候，我真係無辦法好肯定咁答到自己，你明唔明啊？」
 
我無出聲答我，我都係度思索緊，靜靜咁食每次嚟呢間鋪都會嗌嘅芒果西米露。
 
「咁你呢？你有無諗過同呀詩分手？」我估唔到子晴會突然間咁樣問。