《我的MK妹同桌》第二季: 137

不過一早就已經習慣呢種平淡，各有各嘅生活。
 
「生日你諗住點過啊？」我直接問呀詩。
 
以往，我會諗下一啲驚喜，準備好耐好耐，就係為咗佢因為見到呢份禮物而露出驚豔嘅樣。
 
我會因為呢一下爽好耐好耐，返到屋企臨瞓教前都係loop緊呀詩嗰一幕。
 
但係依家唔會，一嚟無咁嘅時間，二嚟咁樣做好攰，同埋覺得之前都整過唔少驚喜俾呀詩，今次唔整無壞姐。
 




我後來，亦成為唔到我想做嘅嗰類人——
 
就係堅持為咗呀詩，落盡心機。我高估自己，真係天真得可以。
 
「無啊，我呢排啲功課都好多，我唔想爛grade啊，生日都係一日姐，點樣過都無咩問題。」呢幾日都無乜傾到電話，我聽到嘅，都係whatsapp嘅語音多。
 
「咁食餐飯？」我都同意呀詩，唔單止佢，我都係咁。
 
「好啊。」呢段0.3秒嘅錄音，隔咗半日，喺凌晨時分sd嚟。
 




第二朝我覆返佢：「咁你想食咩？」
 
我哋溝通嘅頻率已經去到咁，又有股莫名嘅舒暢。
 
「求其一間都得㗎啦，交俾你諗啦！唔係我生日都仲要交俾我做啊？」佢語下之意姐係：作死啊？
 
到咗呀詩生日，真係我哋第一次過得咁簡單，平鋪直敘到我都唔知可以點樣描述。
 
約係間餐廳，唔算高級，就咁普通不過嘅餐廳，但呢款嘢係呀詩好鍾意食嘅類型，我專門揀咗間平靚正嘅。
 




佢嚟到，無乜特別打扮，好素咁出嚟，妝都無化。
 
反而呢個樸素嘅樣有返啲MK妹味係度，戴咗頂cap帽，寬鬆嘅衫加條短牛，下半身失咗蹤咁，白哲而修長嘅雙腿，加對嗰排好興嘅nmd，感覺有啲⋯⋯重現返當年嘅風彩。
 
餐飯普普通通咁食完，無乜特別嘢，傾嘅都係傾大家學校嘅嘢，最多咪最後買咗個細蛋糕俾佢，加多支蠟燭俾佢吹，影咗幾幅相，就無了。
 
張相仲要挑剔好幾次，又話邊度邊度唔靚，要點影，擺曬post咁，要捧起個蛋糕影⋯⋯啲港女都係咁的。

無禮物，一餐飯，甚至連氣氛都欠缺。
 
「唔好搞咁多嘢啦，要開心嘅話，唔一定要嗰一日先嚟開心，平時開開心心先緊要。」呀詩嗰陣同我講。
 
「我以為女仔對呢啲儀式感會好注重添，無論咩年紀都會鍾意添。」
 
「人會變㗎嘛，之前你講嗰個問題，我返去唔係無諗過⋯⋯嗰陣時我先知，原來我不知不覺間都變咗咁多。」呀詩忽然認真起上嚟。




 
食完飯後，我哋係街度漫無目的咁散下步，頭先食得太飽啦。
 
「會變好正常姐，我都會。」我講。
 
「我哋呢個期間除咗愛情之外，仲有其他嘢想追求啦，我一直以嚟都好想脫離屋企嗰種家境，同時間因為屋企咁樣，我由細到大都好無安全感，好彩中學嗰陣識到你，我先可以毫無後顧之憂咁去追求自己想要嘅嘢，但原來咁樣⋯⋯係會⋯忽略咗你。」後來講講下，我聽得出呀詩嗚咽嘅聲音。
 
「其實我好明，我自己都一樣係咁，我想上返U，我想入返同你同一間大學，我哋就可以多啲時間見下，但係同時間，我想係呢兩件事入面拎個平衡。」
 
「係我搏命讀書嘅同時，我想兼顧同你嘅感情，我開始發覺如果我哋兩個都係追求緊其他嘢嘅話，我哋會慢慢行得越嚟越遠，我哋會無咗嗰個連結點，到時候可能去到想修補都無辦法修補嘅地步。」
 
我拖住呀詩係熟悉嘅旺角度行，我哋都好多嘢回憶，朗豪坊已經俾我哋行到無嘢好行，行嚟行去都係嗰幾間鋪。
 
但每次經過，我都忘記唔到我第一次同呀詩喺條長命電梯度見其他MK仔女攬攬錫錫，自己又跟住佢哋咁樣對呀詩攬攬錫錫。
 




後來唔會再係嗰度打茄輪，會攬下，打打鬧鬧，傾下偈。
 
「所以係我做得⋯⋯唔夠⋯好，Sorry。」呀詩愧疚咁同我講。
 
我信我哋呢段關係入面無第三個人係度，但原來都可以咁多嘢煩，唔一定要去到分手嘅地步，先整喊到人。
 
我見到呀詩咁樣，身為男人嘅我，都有啲眼濕濕。
 
「我哋唔洗比較邊個做得好啲，我只係想我哋可以係呢段關係度，坦坦白白。」
 
我哋又行到嚟朗豪坊。
 
行上呢條電梯，呀詩悠悠地說：「但係咁樣落去，你會好委屈。」
 
我企係呀詩下面，佢同中學嘅look完全唔同曬，由頭到腳都唔同曬，但我好似比以前更加愛佢⋯⋯




 
我做返四年前嘅動作，吻上呀詩嘅雙唇，無放開，電梯緩緩咁升上去，我哋溫柔咁打茄輪。