《我的MK妹同桌》第二季: 141

「佢之前有試過幾次，但我真係好攰，同埋好辛苦，先同佢講暫時唔好住。」
 
「跟住呢？！」我問。
 
「跟住佢就嫌棄我⋯⋯咁我嗰刻真係好唔想啊嘛，我其他女仔朋友都會講佢哋啲經歷，我都會想試下，但每次到嗰個moment我就覺得未係時候。」Gigi把聲就咁聽都覺得好委屈。
 
Gigi咁樣做真係無錯，自己嘅第一次梗係想珍而重之咁交出去，唔想咁兒戲都好合常理。
 
但係電話面前，我語塞。唔知講啲咩安慰佢，又唔知俾咩意見先有用，更加唔想講啲呀媽係女人嘅廢話。
 




「喂⋯喂？」Gigi呼叫我。
 
「聽緊啊。」我抽離個思緒。
 
「你覺得我可以點⋯⋯我真係唔知點做，好辛苦啊⋯⋯我好鍾意佢，我唔想初戀就咁樣完。」
 
「我可以點做啊？」Gigi問我。
 
Gigi佢講完「初戀」兩隻字之後，我猛然諗返起，呀詩都係我初戀嚟，我竟然開始忘記呢一樣嘢，覺得件事好神奇。
 




初戀可以一齊咁耐，而且仲要好似佢咁好，我係唔知行咩狗屎運。
 
「但係你好鍾意佢，嗰個時候卻俾唔到佢？」我講出自己嘅疑惑，我想知佢嗰刻點諗。
 
「我係想嘅，但佢嘅行為令我⋯⋯好緊張，好似急住想要放入嚟咁。」聽住Gigi咁講，感覺好怪異。
 
個怪異嘅位係當下有曬畫面。

我唔敢再往下諗，然後我繼續問：「佢有咩反應啊？」
 




「佢一開始都講話慢慢嚟，唔急嘅，但第二朝起身就又想試⋯⋯」我幾感激Gigi對我嘅信任，呢連啲都會同我講。不過可惜嘅係，我都唔知可以點幫，唔通叫佢同我試下，睇下知唔知個問題係邊啦喎？
 
無可能㗎嘛。
 
「就咁睇嘅話，你男朋友都唔係咁好嘅姐，我唔會戴頭盔，我都真係講事實。你哋第一次都搞到咁唔愉快嘅話，好影響你哋之間嘅關係，性係一段關係入面，真係好重要，呢樣嘢大家平衡唔到嘅話，一係你辛苦，一係就佢辛苦嘅姐，而且佢仲會嫌你嘅話，日後但凡你哋有咩唔順心，就會咁樣嫌，嫌棄多過體諒。」
 
哇，我忽然間好似聖人上身咁，唔講唔覺自己都成熟咗添！嘻嘻嘻嘻⋯⋯
 
「咁姐係你都覺得我要俾佢？」Gigi咁樣一問，我白眼都差啲反埋出嚟。
 
「唔係啊，我無話要你俾佢定唔俾佢好，我只係想話俾你知個事實，然後分析俾你知姐，你俾唔俾佢，應該係你話事㗎嘛。」搞到咁我怕佢諗埋一邊。
 
「嗯！」Gigi心情仍舊低落。

「如果佢係要逼你嘅，你都知佢係咩人啦？」忽然間我又做咗開導人嘅角色，我真係唔識安慰人㗎！




 
「但我真係唔想分開⋯⋯嗚嗚嗚⋯⋯因⋯因為佢，呢排都搞到我憂鬱症又復發⋯⋯嗚嗚⋯」
 
哇，原來Gigi之前係有憂鬱症㗎？不過佢平時俾我嘅感覺都係有啲陰陰沉沉嘅感覺，而且成個人諗嘅方向係偏負面，所以聽到佢咁講就更加證實咗我一路以嚟嘅猜測。
 
「無事嘅，下個會更好㗎嘛！」我又講埋曬啲廢話，但除咗廢話我都唔知講乜好⋯⋯
 
「又唔係世界末日，初戀無咗，代表之後仲有更加好嘅人，有第一次就有第二次，呢個只不過係開始，就好似踩單車咁，一開始唔識踩，仆咗街，第二次你就識踩啦，識平衡，咁咪唔會再仆街囉？」我亂咁嗡。
 
「嗚⋯嗚嗚⋯⋯多多⋯多謝你啊⋯⋯」Gigi仍舊用佢嘅哭腔同我講。
 
之後佢話自己心情好返啲，其實佢唔係想要一啲咩有用嘅意見，或者要啲有用、有啟發性嘅說話，只係想有個人聽佢講佢嘅情緒。
 
情緒係感情嘅副產物，平時會隱藏起嚟，但點都需要釋放出嚟。
 




佢釋放完好返啲，就收咗線。
 
Gigi無力挽回分手嘅結果，同我之前一樣。一樣都係咁唔捨得，分別在於，我係好彩嗰一個，而且有得再次係返埋一齊；而Gigi，另一半俾帽你戴，正常人都唔會中返個頭埋去。
 
好明Gigi此刻嘅感受，但呢種感受已經離去我好遠，就會再點樣回想，都唔會再咁強烈。
 
無啦啦做咗人哋嘅感情輔導員。
 
呀詩夜晚都有打俾我，大家都係講啲好雞毛蒜皮嘅事，自從上次溝通過後，情況真係有改善到。
 
最開心莫過於大家真係有咁嘅心想維繫。
 
因為越嚟越大個，見到身邊嘅朋友好多都係不歡而散嘅例子，就會好慶幸自己仲可以同到呀詩行咁耐。