《我的MK妹同桌》第二季: 196

同一個人一齊得耐，身邊有好多事，唔多唔少都影響咗對方。
 
我由一個唔食菜嘅人，俾呀詩成日塞啲菜過嚟；由一個飲珍珠奶茶唔會嗌少甜嘅人，到依家嗌襯都微甜；由一個中學唔太注重衛生嘅人，到依家有潔癖。
 
影響真係可以好大。
 
我哋人生有幾多個呢啲相伴嘅日子？呀詩唔係我身邊嘅時候，我更加察覺到個落差，同以前嘅自己分別有幾咁大⋯⋯
 
佢嘅習慣已經融入曬我嘅生活，好似周圍都仲有佢嘅影子咁。
 




我亦都開始明白long d嘅煎熬。
 
之前唔太明人哋所講嘅long d好難捱，係咩一回事。不過我都慢慢明白，除咗見唔到之外，個時間根本難夾到仆街。
 
我日頭做緊自己嘢嘅時候，呀詩係嗰邊瞓緊教，唔係成日都就到時間skype。
 
我明嘅，所以我都嘗試俾自己適應呢種節奏，唔打擾都係一種愛嘅表現。
 
初頭我以為都ok啦，我哋keep住咁樣維繫都無乜問題⋯⋯的確嘅，一開始呀詩都無乜嘢，過到去所有嘢都新鮮，所有嘢都如夢般美好，同自己想像嘅生活一樣。
 




但慢慢就唔同了。
 
早知如果係咁樣嘅話，早知最後會搞成咁，我絕對唔會應承，會想盡辦法同佢一齊過去。
 
喺之後，每次我諗返起呢件事，我都會有同一樣嘅諗法，係每次！

呀詩佢嗰邊仲未開學，佢settle緊身邊嘅嘢，而我要開學。
 
好彩嘅係我上個sem遇到啲肯做嘢嘅組員，真係上咗u之後啲人正常好多，唔係話無，至少比例上好啲。
 




開學頭，就差唔多決定好學期中嘅去向，有好多嘢煩，而我哋嗰期煩緊嘅，就係好唔好暑假嗰陣實習。
 
呀詩去exchange之前，我有問過佢實習點樣，社工唔係要實習嘅咩？通常都係year3暑假。
 
佢話佢揀咗係year4嗰陣實習，忙係忙啲，佢都預咗之後chur㗎啦，咁佢點都想出去試下啊嘛。
 
基本上佢一返嚟，就要忙住返學同埋實習了。
 
我都已經可以想像佢有幾忙⋯⋯
 
我自己都係啦當然，我都諗緊好唔好去實習，儲咁啲經驗，畢業之後搵工都易啲啊嘛。
 
「你嗰邊屋企點啊？」就算要忙，都要搵時間同佢傾個電話。
 
有時係我傾耐啲，寧願瞓少啲；有時係佢會傾耐咗而遲瞓。




 
「呢個寄宿家庭幾nice，佢話佢哋成日都收留唔同地方嘅留學生，已經慣曬，上幾次好似都有香港留學生住佢度。」呀詩分享佢啲事嘅時候特別開心。
 
「咁幾時開學啊？」我問佢。
 
「差唔多啦，月中就開學啦。」我哋就連好小嘅事都可以傾一餐。
 
我哋都知道因為long d先會係咁樣嘅狀態，因為平時係香港，個感覺就係覺得反正都成日見，隨時都有得見，唔會好似依家咁格外珍惜每一次通話。
 
打個比喻，細細個屋企人成日限住你打機，嗰一兩個鐘頭打機時間特別珍貴；大個咗，你想幾時打都無人理你，反而就無乜想打機嘅意慾。
 
小別勝新婚，形容依家嘅我哋最貼切。
 
「你嗰邊凍唔凍？」
 




「時凍時唔凍啦，香港地睇溫度著衫㗎嘛，有時熱到可以著短袖㗎。」
 
「我呢邊日日都凍到仆街，呢排仲落雪添，我咁大個女第一次睇到雪！」呀詩好興奮咁講。
 
但我有啲失落⋯⋯
 
我想呀詩第一次望住雪嗰陣，我係隔離。

「如果你係度就好啦。」呀詩講完呢句，真係痛入心，無奈嘅感覺係可以令人心痛。
 
「日子咁長，實有機會再同你去睇雪嘅。」我安慰佢，同時都係安慰自己。
 
「喺呢度我真係見識到好多我未曾見過，或者未曾想像過嘅嘢，係好開心同好興奮，但係異地開始耐呢⋯⋯會發現呢度始終唔係自己地方，無辦法真係融入。」
 
「哇！你都係啱啱去到無耐咋喎，講到好似你留咗好耐咁。」我笑佢，唔講仲以為佢係嗰邊幾年，其實只不過係個令禮拜咋嘛。




 
「喂啊！又串我⋯⋯」佢係鏡頭前面高舉個拳頭，想一嘢打落嚟。
 
呢幾年我食唔少佢嘅拳擊，條友仔打人真係好痛⋯⋯好彩我皮硬肉厚先無事。
 
估唔到嘅係，明明隔住個鏡頭，我都仲下意識咁避一避，縮一縮。
 
「你做咩縮啊？你夠膽縮？？」呀詩兇我，瞪大雙眼嘅佢都好可愛。
 
我竟然想呀詩可以打到落嚟，一如既往。
 
「係喎，我做咩縮？夠薑你咪打過嚟囉！」我挑釁佢，有幾嬲打就有幾嬲打！
 
「真係激鬼死我！」
 




我哋慢慢明白long d嘅痛苦，就係有一剎那你以為對方就係你身邊，你想好似往常咁樣同佢互動⋯⋯
 
當你清醒嗰一下，先係最痛苦嘅根源。
 
「有無掛住我咁樣成日激下你呢？」我問佢。
 
「有啊。」
 
「咁犯賤？」
 
「我唔知點同你形容好，喺呢度係好新鮮，係好開心嘅體驗，但就係有種你唔屬於呢度嘅孤獨感，你會想係度搵返啲香港人陪你。」
 
「只有同一個地方成長嘅人，先有共同語言。」
 
「所以我先允許你咁大膽！」
 
的確，我都發覺呀詩搵我嘅次數其實係多咗⋯⋯初初我都以為佢會忙啦，無咁多時間搵我，同埋又有時差問題，但佢比起喺香港嗰陣，搵我嘅頻率高咗好多。