《我的MK妹同桌》第二季: 198
好快我就訂好曬機票，呢一程真係貴到心痛，不過無辦法嘅，有啲錢點都係要洗。
我訂咗下個月嘅機票，搞掂曬啲功課先，呢排都真係好chur，多project要跟，仲有啲自己嘅功課同埋考試，邊個話讀大學容易話？
然後仲要keep住更新下實習嘅嘢，最近先搵到間啱嘅，聽講好似有個同學係同我一齊去同一間公司度實習，算係大公司嚟。
我係真係忙到一個點係⋯⋯連諗起呀詩嘅時間都無，係每件事我都需要投入去做，先會做得好嘅嘢嚟，做唔好會出事嗰隻。
咁呢段時間我都有同呀詩溝通過嘅，呀詩口講就okay，但其實呢個係一種妥協嚟。
一種愛你嘅妥協。
正正嗰個時期，呀詩係好想我陪佢，就算佢唔明講，我都感覺得到佢嗰下係無辦法，知我都忙，唔想阻我，然後委屈自己。
由佢嘅訊息量同埋字裡行間嘅溫度，係睇得出呢啲嘢嘅。
我只可以盡量快啲做完曬啲嘢，陪佢，執過去英國搵佢，我嘅打算就係咁。
此時此刻嘅我，係無辦法想像佢係有幾煎熬，但我知佢好辛苦⋯⋯
因為從來都唔會咁樣嘅佢，會有咁大轉變，可想而知佢真係捱唔住。
我驚嘅係佢心理上嘅健康。
所以我依家講嘅每一句都小心翼翼，更加唔想嗌交，再加上依家long d呢，會好難搞。
個心結亦都會因為距離而拉遠。
同一時間，呀詩都一樣要忙考試，佢覺得比香港更加難搞⋯⋯
就好似自己想咁樣，但點都順唔到落去咁。
有陣時，我都唔知可以點安慰佢。
係呢段期間，我有去問子晴。
「呢排呀詩有無搵你啊？」我whatsapp佢，而且我都想搵個人傾訴下。
以前細細個嗰陣，覺得啲女仔成日都要呻，要抱怨嚟做咩姐？
同埋有種好大男人嘅諗法，就係男人應該就係要頂天立地！真係唔知邊個教我㗎喎⋯⋯但總係覺得有咩事發生都好，男人係應該揹起曬所有嘢係膊頭度。
呢種先係我欣賞嘅真男人！
所以我就更加唔明點解女仔周不時都要呻，呻完對件事又唔會有咩幫助嘅，呻嚟做乜？不如搵方法解決好過啦？
好似生存得越耐，就越係知道有啲事情係解決唔到，係唔輪到我哋去解決，但啲問題又會影響到你喎，咁你可以點？
就好似依家咁，呻下，係因為知道自己無能力解決件事，只係但求自己心理好過啲。
「間唔中囉，佢都有搵我啊，做咩啊？」子晴同我哋一樣，都忙到癲，但見佢多咗係ig上面po相，好似見佢都過得幾多姿多彩。
佢亦都慢慢走出同蕃薯仔嘅感情。
記得當初分咗手嘅佢哋，有好一段時間各自都無更新自己啲社交媒體，接近一年吧？無記錯。
子晴同佢男朋友嘅關係都好似幾唔錯，大時大節都有見佢po相，平時就好少po嘅，加上自從ig推出咗story之後，po相嘅習慣就變咗純粹嘅記錄性，而po story即變成日常生活嘅分享。
我自己就甚少經營自己ig，男仔真係好懶得打理，反而都係我身邊女仔fd用得密ig story。
呀詩都係㗎，佢啲相除咗sd俾我，就係po係story度。
我諗咗一諗，然後問佢知唔知呀詩係嗰邊嘅讀書情況，子晴表示都唔清楚。
最後我都係決定將呀詩所有嘅情況都同子晴講，事關我自己都唔知點算。
我最驚係呀詩唔知會唔會有啲咩情緒問題⋯⋯
「我覺得真係要睇實呀詩嘅情況喎，我都有聽講過話有啲人過到去其實唔適應嗰邊啲生活，而有情緒病⋯⋯」
「頂，我俾你講一講我都好擔心呀詩啲情況。」子晴無打emoji，證明佢真係認真嘅。
「你飛過去睇下佢啦。」子晴同我講。
「我有啊，我已經買咗下個月機票啦，等我完咗個midterm我就飛㗎啦！」
「哇，都好快喎。」
「你同呀詩講咗未啊？」子晴隔咗一陣問我。
「未啊，你覺得我講唔講好？」我唔知點決定好，人哋就心中有數，我依家真係無，完全無諗法。
「你未講㗎原來？」
「我覺得如果係啲特別日子，情人節啊聖誕節、週年之類嗰啲呢，而佢又係呢啲時候表明掛住你，想同你講，然後又因為距離遠，機票貴而見唔到面，呢個情況你唔話俾佢知而飛過去呢，就好撚sweet嘅。」
「但依家你係擔心呀詩嘅情緒而過去探佢，我覺得無乜事唔好搞啲咩驚喜好啲，到時變驚嚇你就收唔到科。」
難得子晴打成串長嘅嘢俾我，千字文已經慢慢沒落緊，除咗有誠意，亦都有道理。
我都認真諗過佢段說話，與其搞呢啲無謂驚喜，不如令呀詩安心啲仲好啦。
有陣時，真係靠自己個腦呢，係未必諗得咁周到，諗太多方面嘅嘢，反而會漏咗至為關鍵嘅點。
嗰晚視訊，我將呢個消息話咗俾呀詩知。
「真係㗎？你真係過嚟？點解嘅？點解嘅？」佢個反應都好驚訝，碌大隻眼，嗰個開心嘅表情收唔埋。
見到佢咁，其實都唔洗專登唔講，飛過去俾個驚喜佢啊，可能俾著我都會係咁。聽到另一半話要過嚟嗰一刻，點都好雀躍，忍咗好耐嘅思念，瞬間充滿住期待。
「仲有咩點解姐，你想有好多原因咩？」我甜笑著。
「想啊，你講嚟聽下？」呀詩對眼發緊光咁，佢真係好興奮。
「掛住你啦，想見你啦，擔心你啦，想探下你啦，想同你出去玩啦，仲夠唔夠？」多啲講下甜蜜嘅說話，會滋潤到段關係。
但礙於大多數男人嘛，唔鍾意呢啲咁骨庳嘅說話，講唔出口，段關係就少咗愛情嘅甜言蜜意。
當然係可以靠其他嘢做到呢個效果，不過要花更多功夫。
「夠。」呀詩滿足咁講，仲點埋頭，佢個可愛樣又再出返嚟。
好似之前嘅憂鬱一掃而空咁。
果然，我呢個決定係做啱咗，就算真係貴到仆街，都覺得值得。
＊＊＊＊＊＊＊＊＊＊＊＊＊＊＊＊＊＊＊＊＊
有興趣可以follow埋
@__book.s0n
https://www.instagram.com/__book.s0n/