《我的MK妹同桌》第二季: 250

有次post咗去游水嘅story，呀Ken覆咗我個story，佢問我游水？然後話佢自己都有游，問我一唔一齊。
 
中學嗰個世界仔呀Ken，已經好幾年無聯絡啦，但有互相follow ig嘅，有啲人就係保持住咁樣嘅關係，唔咸唔淡咁樣維繫著。
 
我記得我係婉拒咗，可能真係人大咗，唔想咁多social，同埋同佢唔係咁熟，而且中學嗰陣又唔係咁鍾意，亦都唔想勉強自己。
 
而我亦都係透過ig story，知道一啲呀詩嘅事，佢已經唔再佔據我嘅生活，開始習慣無佢嘅生活，同時亦都希望佢可以過得好。
 
我同佢嘅分開係悲傷，但唔係不快，所以先可以做到咁吧？
 




生命中有過呢一段感情，對我嚟講，係件特別且有意義嘅事。尤其是分開後嘅時間點回望返，會感激曾經有過呢段經歷。
 
可以分手後換嚟正面嘅影響，有幾多段感情可以做得到？
 
我透過ig story知道呀詩已經返咗嚟香港，佢都開始緊佢忙碌嘅last year⋯⋯
 
因為都見佢成日post佢實習嘅嘢，我心入面其實都好奇，同埋都在意，佢分咗手之後係點睇我嘅呢？
 
係已經放開咗？定還是都仲有些牽掛？
 




會唔會好似當年咁樣，係海旁嘅時候，係同一樣心情呢？
 
喺臨近聖誕嘅季節，凍凍地嘅天氣，係最想有個人陪伴自己，溫暖自己嘅時候。
 
而且香港聖誕好有氣氛，鋪天蓋地嘅擺設令一個人嘅孤獨感更加強烈。
 
我同呀詩分開都已經過咗大半年，我哋一直都無聯絡，我知佢有睇我啲story，亦都無block對方任何嘢，就咁樣靜靜地關注著，不打擾對方。
 
直至我同佢偶爾再相遇返⋯⋯
 




我覺得咁樣相遇好好笑⋯⋯