是咁的，我同女神做咗鄰居: 123.

「喂啊童！又話唔講出去既，點解啊言會聽到㗎？」Suki不滿地說。

 「唔係，唔好講呢啲住啦，我唔知都知咗啦，你繼續講埋落去！」我一把搶過啊童的電話，對著它說。 

「無，個日我就約咗個靚仔去倒數，咁難得約到個靚仔，我就唔會為咗你地而放佢飛機既。」 

「喂！之前你又日日話我重色輕友，宜家你咪一樣係咁，剩係顧住個靚仔唔理我地。」輪到啊童把她的電話從我手中搶回去了。 

「唓，你都係因為啊言想去唱K，所以你先去啫。如果啊言話個日單獨約你出街，你仲會唔會去唱K吖？唔會㗎嘛，有仔陪緊係陪仔㗎啦，你都On9㗎。」





 「緊...緊係唔係啦，如果你去既話我都會去唱㗎。」啊童急忙為自己辯解。 

「你收皮啦，頭先我叫你去啊，你仲好唔情願咁㗎，又話咩要帶埋本書去溫，最後都係因為我話想去，所以你先至話去咋嘛，由頭到尾都冇提過Suki。」我說。

 「你講咩啊！」啊童大力打了我一下。

 「講真話都比人打...」 

「唉，你兩個好L煩，總之我個日就要同個靚仔出街啦，唔會嚟唱K㗎啦，講完。」說罷她便Cut了我們線。 





「喂！」啊童急忙喝止住她，可惜已經太遲了。 

「你覺得係邊個嚟㗎呢？」我問。 

「真係唔知喎，完全冇聽佢提起過。」 

「連你都唔知？真係提都冇提過？有冇話覺得咩人好靚仔啊，諸如此類既說話啊？」 

「好似...佢係有提過話某個師兄好靚仔既，但係應該佢地兩個係互不相識既，冇理由比佢約到出街㗎喎。」





 「師兄？中幾㗎？」

 「我都唔知啊，佢都只係有一次好略略咁提過吓話有個師兄好靚仔啊，好想溝佢啊，咁咋。但係自從個次之後，就冇再聽佢講過啦。」 

「唉算，唔講佢啦，溫書啦。」我說。

 「叮」電話再次響起。

 魚蛋：Book好咗啦，六點唱到第二朝五點。 

「咁我地個日五點半到係呢度出發？」我問。

 「好啊。」

 到了當天，啊童依舊一早便來了我家跟我一起溫習， 





到了五時半，我們便準時從家裏出發， 

「你有冇諗過，如果，我係話如果，你想同我表白，你會唱咩歌啊？」 

「吓，冇諗喎。」

口裏雖這樣說，但其實我一早就想好了，

要唱「小傳奇」這首歌，但為了減低啊童知道的風險，

所以我是絕對不會對其他人說的。 

「講時講，好似識咗你咁耐，次次都係我唱，都冇聽過你唱歌喎。」我繼續說。





 「哼，本小姐把金口係唔會隨便開㗎。所以你未聽過係正常㗎。」

 「咁請問你一陣間會唔會開金口唱兩句呢？」

 「唔知㗎，睇下心情啦~或者我心情好會唱下既。」 

「好似講到，聽到你開口唱歌，係一件好困難既事咁啵。」 

「係㗎，因為我驚呢，我一開口唱歌呢，個啲唱片公司呢，就會攞住份合約嚟搵我。唉，但係我又唔想咁高調喎，咁咪唯有少啲唱囉。」啊童裝作自己是迫不得已，才不能開唱歌。 

「你放心，我都未有人搵，幾時輪到你啫。」

 「收皮啦你，我啊，有樣有實力，不知幾多公司爭住簽我啊，你？最多咪得星夢肯簽。」 

「喂！你咩意思啊！好侮辱喎！話晒都攞過亞軍吖。」 





「如果我有參加啊，你得季軍咋傻仔~」 

「嚟吖，一陣我地各自揀首歌唱，再由佢地評分。好冇？」

 「驚你啊？我驚你冇面咋。」





跪求大家Follow我既IG: MaanYin05