「今次應該係最後一次同你一齊放學喇,不如去食個甜品先返去?反正試又考完我地返去都無嘢做㗎啦。」我說。

 「你請喎。」啊童調皮一笑。

 「噫...識咗你成年有邊次食甜品唔係我請㗎...豈有此理,次次都係我請...」我越想越不忿。 

「又好似係喎...」她想了一想後繼續說「咁唔爭在請埋今次啦。」 

「咩唔爭在呀,爭在呀。」



 「你無得揀㗎喇唔好意思,入去啦。」啊童把我拉進甜品鋪中。

 嗚...我個銀包又輕咗...今鋪真係欲哭無淚,原本仲諗住可以叫佢請返次㗎嘛。 

「Yeah!食心太軟。」她立即找個位置坐下,然後叫了兩個心太軟。

 慘...真係好慘... 雖然心太軟的確是幾好食,

但我這一年花在心太軟上的金錢,應該都差不多用了四位數字。




 不過想著想著還是算了,反正這次應該已是最後一次跟她穿著校服吃。 

心太軟上枱時我們還叫了文姨替我們影一張相作個留念。

 「你紥馬尾真係好睇。」吃完後,我檢視著相片時說。 

「你對咗我成年而家先講!?你係咪一直都無認真望過我?」啊童大力扭我耳朵,強迫我轉頭看著她。

 「有有有,日日都好認真望你,臨瞓前都要望下你張相先瞓得著...讚下你啫,唔洗咁大反應。只不過係平時同你出街你唔紥頭髮㗎嘛,咁趁你而家紥咪讚下你靚囉。」



 「啫係你覺得我平時唔紥就唔靚啦係咪?」她狠盯著我問。

 「唔係唔係...各有各靚。」我立即補救。 

「哼,口花花!」她嘴角微微向上揚了一揚。 

「緊係唔係啦,我女朋友咁咁咁靚女又有氣質又可愛又大...呃...總之就係女神嚟啦,講個事實出嚟咋我,唔係口花花㗎。」 

「你講多次又可愛之後嗰句吖。」她微笑地看著我。 

「總之就係女神囉。」我向她回以微笑。 

「好似之前仲有多一句㗎喎。」 

「吓...無呀,又可愛囉。」



 「仆街啦你。」啊童大力踩了我一腳。

 「係。」說罷我便倒到地上。

 「地下好乾淨呀?起返身啦,污濁晒啦套校服。」啊童忍著笑輕輕踢了我一下。

 「哎呀,好痛呀。」我按著比她踢的位置,面容扭曲地說。

 「唔好咁無聊啦萬浩然!起身啦快啲。」她反了反白眼沒好氣地說。

 「唉好啦好啦,唔玩喇。」我笑著起身。

 「有個咁幼稚嘅男朋友都唔知係好事定壞事。」啊童搖了搖頭說。



 「男人係咁㗎啦,我呢啲係叫氹你笑,唔係幼稚,ok?你有我呢個男朋友簡直係幾生修來嘅福份。」我挽著她的手說。 

「俾錢啦,男.朋.友.」

 「而家咪俾囉。」我起身走去付錢。



跪求大家Follow我既IG: MaanYin05
已有 0 人追稿