是咁的，我同女神做咗鄰居: 226.

印象中，這一條路我自上次之後就已經沒有再跟啊童一起行過。

 如今身份上的轉變，再次回到這條算是我們第一次出街一起走過的路，百味交集。 

一切都是過得如此之快，上年發生的事情就如昨天般。

 「嘩，好似無乜點同你行過去百佳，隨咗上次去食雪糕之外。」果然啊童跟我有著同樣的想法。

 「你記唔記得個次我點解要去百佳吖？」我問。





 「買水果吖嘛，點會唔記得啫。」 

「錯！我係為咗見你所以先特登出多啲街睇下有無機會撞到你，估唔到又真係比我撞到喎。」

 「比你撞到又點吖，你都唔識溝女，如果唔係我主動問你呀，你第二日會同到我出街咩？你會攞到我電話咩？全部都係我主動問你㗎！」 

「噫...咁我...唔夠膽吖嘛...咪住先！你咁主動問我係咪好想同我呢個風趣幽默玉樹臨風嘅男神出街先~唔通你個時已經愛上咗我深深不能自拔？」

 「我閘住！無呀！無啲咁嘅事呀！」 





「唔鍾意又會咁主動嘅。」 

「哼，我想搵人陪我食...食雪糕之嘛。」她急道。

 「哦！原來你一早就鍾意我喇，早響吖嘛你。」 

「食雪糕luuuu！」她一奔一跳地走進去百佳，活像一個小孩。

 「喂！唔好諗住逃避個問題。」我在後面喊住她。





 「你食咩味呀？」 

「照舊啦。」 她於是拿起兩杯朱古力味雪糕，然後走去付錢。

 作為一個男人，我決定把付錢這個責任交給啊童。

 就如上次一樣，我們走到了百佳外吃雪糕。

 「你又好嘢喎，呢年嚟係咁食甜嘢，平時食飯又咁大食，但係好似無乜肥過咁嘅？」我上下打量著她。

 「哼，駛乜講？我呢啲天生麗質食唔肥。」 

「唓，你咁樣日日做運動法，想肥都幾難。」

 「有無諗過就算本小姐唔做都唔會肥呢？」 





「會唔會肥我唔知，但係你成個細路女咁就應該一世都改唔到。」我伸手為她抹走嘴角的朱古力。

 「做咩呀你！」她突然大聲怒罵我。 

「你...你嘴角污濁咗我幫你抹...囉。」我嚇了一嚇。

 「你同我講吖嘛，我可以食返佢㗎嘛，你而家抹走咗我就無得食喇！！！嘥晒啲嘢！」她向我怒吼。 

完全沒有想過她會是這個反應的我呆了一呆，一時之間不懂得如何回答。 

「點知啫...明明上次我咁樣幫你抹你都唔係咁嘅反應，你上次塊面係即刻紅晒，怕怕醜醜咁㗎嘛。」 

「上次你係咪我男朋友呀？我個時連你咁變態我都唔知啦！同你都唔熟，咁緊係怕醜㗎啦！同埋女仔要有儀態㗎嘛，唔通啱啱識咗個男仔就咁樣鬧佢咩？」





 「騙局...根本就係一個騙局...今鋪真係騙徒手法層出不窮...以前你唔係咁㗎！」 

「係呀！你吹~咩？」

 「咁我又真係吹你唔漲...早知個時我都扮下嘢啦。」

 「吓你咪扮咗囉，扮到成個正人君子咁。」

 「我根本就係囉好無？」 

「收皮啦你！」她用口咬著匙羹，把其中一隻手空出來，然後對我舉中指。

 「係喇係喇我認我係喇，快啲食埋佢啦，呢度好熱呀。」

 「邊個叫你食咁快啫，熱你咪走囉！如果你夠膽嘅話。」 





「唔敢唔敢，慢慢食慢慢食。」






跪求大家Follow我既IG: MaanYin05